Tempotimor (Kovalima)-Sekretáriu Estadu Formasaun Profisionál no Empregu (SEFOPE) atribui sertifikadu apresiasaun ba estudante 47 husi Canosa Vocational Training Center (CVTC) ne’ebé durante tinan ida aprende ona iha área Administrasaun hamutuk na’in 18, Ospitalidade na’in 26 inklui kursu komplementar na’in tolu.
Diretor Jerál SEFOPE, Paulo Alves enkoraja graduante sira atu hatama proposta iha SEFOPE, tanba SEFOPE iha programa Auto Empregu hodi fó apoiu ba jovem sira ne’ebé iha talentu no kriatividade.
“Agora ita-boot sira gradua ona, depois imi nia sertifikadu ne’e sai lixu ga oinsa? tanba ne’e maka ami mós hakarak enkoraja alin estudante sira karik iha inisiativa bele hatama proposta ba SEFOPE minimal ema na’in lima, tanba ami iha programa ida naran formasaun auto empregu, ita fó apoiu jovem sira ne’ebé aprende ona iha sentru formasaun, sira iha talentu no kriatividade atu hamosu sira-nia negósiu hodi hakbi’it sira-nia aan atu nune’e bele fó servisu ba ema seluk, ita reduz taxa dezempregu iha rai ida ne’e,” dehan DJ ne’e hafoin atribui sertifikadu ba estudante sira iha Salaun CVTC Suai, Kinta (09/12).
Iha tempu hnaesan Diretora CVTC Suai, Cândida de Castro Perreira mos enkoraja graduante sira atu esforsu nafatin maske hetan ona sertifikadu, tanba ema ne’ebé susesu bainhira hetan ona servisu ruma.
“Ha’u hakarak dehan ba alin sira katak susessu ne’e la’ós simu sertifikadu ne’e, maibé susesu ne’e ema ne’ebe hetan ona servisu hodi sustenta nia moris, sustenta sira-nia an no sira-nia familia, ida ne’e maka dehan susessu, tanba ne’e maka labele haksolok ho sertifikadu ne’e, ida ne’e sadik imi oinsa bele esforsu nafatin hodi hetan mahon ne’ebé di’ak ka susessu,” kata Diretora CVTC Suai.
Alende ne’e reprezentante Inan-Aman husi graduante sira, Rita Maria Soares agradese ba SEFOPE no CVTC Suai, tanba durante tinan ida hanorin ona sira-nia oan kona-ba saida maka sira atu halo iha futuru
“Ami agradese ba SEFOPE no CVTC Suai tanba hanorin ona ami-nia oan sira kona-ba saida maka sira bele halo iha futuru para hadi’a sira nia moris,” nia dehan.
Entretantu husi graduante 47 ne’e, balun mai husi munisípiu Ermera, Ainaro, Manufahi no seluk tan no serimónia graduasaun ba Dala XII ne’e, ba estudante iha área ospitalidade, administrasaun no Komplementar.(*)
