Tempotimor (Kovalima)-Autoriedade munisípiu Kovalima, postu administrativu Maukatar realiza desportu ho modalidade maratona ne’ebé atleta Fernando Alves Amaral no Aida Amaral Gusmão sai manan na’in ba desportu ne’e.
Tuir Administradór Postu Administrativu Maukatar (APAM), Sebastião Guterres agradese ba atleta sira ne’ebé sai vensedór iha maratona ne’e, maibé ba hirak ne’ebé la konsege prepara aan ba tempu oin mai.
“Ba alin ka oan sira ne’ebé ohin halai hetan primeiru lugar no to’o terseiru lugar ba mane no feto ne’ebe mak ohin loron ne’e halai maraton, kontinua no prepra ba futuru nune’e tinan oin mai akontese karik bele kontinua,” dehan Administradór Postu Maukatar ba jornalista sira, Kinta (09/12).
Nia afirma, ba atleta sira ne’ebé hetan primeiru lugar sei hetan premiu ne’ebé komisaun organizadora prepra ona.
“Ba alin manan na’in sira ne’e sei hetan premiu, ba rimeiru lugar hetan osan $150.00, segundu lugar hetan $100.00, terseiru lugar hetan $75.00, valór ne’e ba maratona feto no mane,” Tenik nia
Iha fatin hanesan, Fernando Alves Amaral ne’ebé sai manan na’in iha maratona mane nian sente kontenti no agradese ba komisaun sira, tanba liuhusi atividade desportu bele akumula juventude sira.
“Ha’u kontenti tebes ho atividades ne’e, tanba liuhusi atividades halai maratona ne’e bele akumula ami joven sira hodi kria unidade no paz, la kria konflitu, depois halai maratona tenke esforsu no pasiénsia labele fuma no konsumu tua, se ita konsumu buat hirak ne’e ita nia is la to’o,” katak Nia.
Entertantu atleta ba maratona ba mane ne’ebé ho distánsia kilómetru 10, Fernando Alves Amaral sai primeiru lugar, Narcisio Ximenes Barros segundu lugar no Roberto Carlos terseiru lugar. Enkuantu maratona ba feto, Aida Amaral Gusmão sai primeiru lugar, Adriana Mize sai segundu lugar no Meliana de Jesus okupa iha terseiru lugar.(*)
