Tempotimor (Covalima)-Komisaun Nasionál Eleisaun (CNE-sigla portugues) Munisípiu Covalima hahú ona prosesu rekrutamentu ba ofisíais superviziona ne’ebé atu destaka ba sentru votasaun sira iha eleisaun prezidensiál periodu 2022 to’o 2027.
Diretór CNE Munisípiu Covalima, Hermenegildo de Sena informa, prosesu ne’e hahú ona iha loron 29 fulan-dezembru tinan 2021 ne’ebé dadaun iha ona faze teste orál ba kandidatus na’in-113 ne’ebé pasa iha faze selesaun dokumentu no teste eskrita.
Antes ne’e, ema ne’ebé hatama dokumentu hamutuk na’in-266 maibé husi total ne’e nain 113 maka passa ba prosessu teste oral.
“Hahú ema hatama dokumentu ba vaga ne’e, hamutuk 266, entaun iha selesaun dokumentu na’in-157 mak passa, depois teste eskrita ami hare rejultadu, na’in-113 mak liu, ida ne’e mak dadaun ami fo teste orál hela,”dehan nia iha nia kna’ar fatin, sesta (07/01).
Nia hatutan, bainhira rejultadu husi teste orál ne’e, sai ona mak koloka fali sira ba sentru no estasaun votasaun hamutuk 92 iha Munisípiu Covalima.
“Kandidatus sira ne’e, ita bolu ofisiál supervizaun eleitorál, sira ne’e sei koloka ba iha sentru no estasaun hamutuk 92 ne’ebé ezisti iha Munisípiu Covalima,” nia akresenta
Nune’e, ezame orál ba kandidatu na’in-113 ne’e sei remata ohin (07/01), maibé loron atu fó sai fali rejultadu mak sidauk determina, tanba sei hein orientasaun husi nasionál. (*)
