Tempotimor (Covalima)-Servisu Saúde Munisípiu Covalima hahú husi fulan-dezembru tinan 2021 to’o fulan-janeiru tinan 2022 rejista kazu moras denge hamutuk ema na’in-27 iha Postu Administrativu Suai Villa.
“Agora ita rejistu ona kazu denge hamutuk 27 ne’ebé pozitivu ne’e husi Postu Suai de’it, nune’e ekipa saúde sira ba halo kedas intervensaun hodi aimoruk Poling ne’e ba rega fatin ne’ebé afeitadu iha Postu Suai,” dehan Diretór Servisu Saúde Munisípiu Covalima, Filipe Pereira Lemos ba www.tempotimor.com iha kna’ar fatin, sesta (07/01).
Tanba ne’e, husu ba komunidade atu halo limpeza no uza moskiteiru hodi prevene moras denge.
“Moras denge ne’e, perigu maske ema seidauk mate, maibé hau husu komunidade sira idak-idak tenke hamos nia valeta kuak no bidon mamuk sira iha uma oin ka kotuk iha ne’ebé nakonu ho foer, tanba foer barak, susuk mós barak, atu toba tenke uza moskiteiru, nune’e bele prevene moras denge ne’e,”nia informa
Entertantu, ho númeru kazu pozitivu denge sa’e ne’e, ekipa saúde hodi aimoruk rega ona edifísiu balun no Aldeia Asurai Suku Kamnasa no Santa rosa iha Postu Suai Villa. (*)
