Tempotimor (Covalima)-Servisu Saúde Munisípiu Covalima (SSMC) iha tinan 2021 rejistu ema na’in-8 mak pozitivu ba kazu HIV/AIDS, nune’e dadaun kontinua halo tratamentu sidauk rekopera.
“Tinan 2021 ita rejistu moras HIV/AIDS na’in-8 pozitivu, feto na’in-5 no mane na-in-3, ne’ebé dadaun kontinua halo tratamentu iha Hospitál Referal Suai,” dehan Diretór Servisu Saúde Munisípiu Covalima, Filipe Pereira Lemos iha kna’ar fatin, sesta (07/01).
Tanba ne’e, kontinua halo sosializasaun HIV/AIDS ba komunidade sira iha Munisípiu Covalima.
“Tinan 2022 ne’e mós ami sei kontinua halo sosializasaun iha Postu Fronteira mak hánesan Fatumea, Tilomar, Maucatar no Fatululik sira kona-ba moras HIV/AIDS, nune’e komunidaade sira labele halo diskriminasaun ba ema ne’ebé hetan moras ne’e, tanba moras ne’e da’et liu husi relasaun sexual no perigu liu mak tatto no la’os da’et husi susuk ka troka roupa sira,” tenik nia
Nune’e, Direktór Servisu Saúde Munisípiu Covalima husu ba kominidade sira wainhira halo relasaun sexual, tenke uza kondon atu bele prevene moras HIV/AIDS. (*)
