Tempotimor (Covalima)-Kuarta-feira (02/02/2022) ne’e, Parlamentu Nasionál (PN) liuhusi Komisaun A ne’ebé trata asuntu konstituisionais hamutuk ho Ministériu Justisa (MJ) hahú halo diskusaun kona-ba lei Rejime Jurídiku Asosiasaun Públiku iha munisípiu Covalima.
Tuir Prezidente Komisaun A, Parlamentu Nasionál, Joãguim dos Santos “Boraluli” katak, komisaun A hamutuk ho parte governu liuhusi Ministériu Justisa hala’o ona diskusaun kona-ba Lei rejime jurídiku asosiasaun públika ne’ebé governu rasik mak aprezenta.
“Ami mai halo diskusun ba lei rejime jurídiku asosiasaun públika, lei ne’ebé atu fó dalan ba hamosu ordem no asosiasaun, entaun proposta ne’e mai husi governu ho nia títulu mak rejime jurídiku asosiasaun públiku, iha artigu 30-resin ne’ebé sei rezolve iha semana ida nia laran, kuandu fila ba Dili lei ne’e tenke diskute hotu ona,” informa Prezidente Komisaun A, Joãguim ba jornalista sira iha salaun Administrasaun Munisípiu Covalima, Kuarta (02/02).
Nia afirma, maske lei ne’e iha artigu lubuk ida, maibé sei tenta to’o hetan konsesus ba artigu sira ne’ebé krusial para bele hetan aprova durante tempu ne’ebé deside ona.
Iha sorin seluk, Vise Ministru Justisa, José Edmundo Caetano komenta, proposta lei ne’e mai husi Ministériu Justisa ne’ebé atu haree liu kona-ba ekuadrumentu legál ne’ebé durante ne’e seidauk iha.
“Proposta lei ne’e mai husi MJ, klaru katak ita iha tinan 20 ona, maibé ita seidauk iha ekuadrumentu legál ho normativu sira ne’e atu regulariza ita-nia asosiasaun públika, profesionais sira, ho ida ne’e mak oitavu governu konstituisionál iha hanoin ida para elabora ho ekuadrumentu legál sira atu prienxe lakunas sira ne’ebé durante ne’e iha,” Edmundo informa.
Governante ne’e subliña, asosiasaun barak mak estabelese ona maibé seidauk iha kontrola ho didi’ak ho ida ne’e asosiasaun públika profesionais husu atu muda ekuadrumentu legál ida ezerse ba estadu nian, no iha norma konjunta ne’ebé normativu ba interese estadu nune’e bele kontrola asosiasaun sira ne’ebé eziste.(*)
