Tempotimor (Covalima)-Tuir Ministru Edukasaun Juventude no Desportu (MEJD), Armindo Maia katak, hakarak edukasaun kualidade iha Timor-Leste hodi produz rekursu umanu ida di’ak, tenke prepara kondisaun ho di’ak.
“Ita hothotu hakarak edukasaun ne’ebé forte no kualidade, tenke dudu lalais ona konstrusaun eskola sira, nune’e neneik ba bebeik dudu buat ne’e lalais, tinan rua ho balun ita bele konstrui ona eskola sira ne’e, maibé ne’e buat boot, maibé buat ne’ebé ki’ik ita halo dadaun hanesan fundu ki’ik sira ne’e ho emerjénsia, nune’e edukasaun ne’e bele forte,” Hateten Armindo Maia iha salaun Edukasaun Munisipiu Covalima (EMC), Horseik (04/02).
Governante ne’e afirma, oitavu governu liuhusi Ministériu Edukasaun Juventude no Desportu (MEJD) promete ona no sei harii no reabilita eskola 500 iha teritóriu Timor-Leste laran tomak, nune’e iha tinan 2022 governu sei hahú harii no reabilita uluk eskola hamutuk 250.
“Ba tinan 2022 ne’e MEJD sei hari no hadia eskola 250, ne’ebé komprimísiu oitavu governu nian, bainhira mandatu atu remata, pelumenus eskola hamutuk 400 to’o 500 mak sei hadia no harii,” katak Armindo.(*)
