Tempotimor (Covalima)-Koordenadór Grupu Arte Marsiais Kmanek Oan Rai Klaran (KORK) iha Munisipiu Covalima, Justino Guterres Maia husu ba membru KORK atu labele uza atributu arte marsiais nian hodi partisipa iha kampaña Eleisaun Prezidensiál.
“Atividades organizasaun ho atividades polítika nian la hanesan, ne’ebé ami husi KORK husu ba membru sira labele uza atributu organizasaun nian hodi ba tuir kampaña ka ba vota iha sentru votasaun, tanba lei bandu,” dehan Justino ba jornalista sira iha salaun Uma Feto Covalima, Segunda (07/02).
Koordenadór ne’e akresenta, bainhira identifika membru sira mak utiliza atributu grupu nian iha kampaña ka Eleisaun maka autoriedade judisiáriu hodi halo prosesu investigasaun.
“Karik kampaña ho eleisaun maka ami identifika membru sira uza farda arte marsiais, ami sei submete ba autoidade judisiáriu hodi halo prosesu investigasaun, tanba ami la autoriza membru sira uza farda arte marsiais hodi partisipa iha kampaña no eleisaun” Justino alerta.
Entretantu Prezidente Komisaun Reguladora Arte Marsiais, Francisco Barros husu ba Grupu Arte Marsiais sira ne’ebe ezisti iha Covalima, atu labele uja atributu arte marsiais no labele hamosu konflitu iha prosesu kampaña no eleisaun.
“Ha’u husu ba maluk sira husi Arte Marsiais sira ne’ebé iha Covalima karik tuir kampaña iha Eleisaun Prezidensiál ba tinan ne’e labele uza atributu organizasaun nian, se lae sei hamosu konflitu,bainhira hala’o kampania,” Hateten Fransisco.(*)
