Tempotimor (Covalima)-Tuir Xefe Programasaun Servisu Protesaun Sivíl Dezastre Narurais, Quintino da Costa katak, husi fulan janeiru 2022 nia rohan to’o fulan fevreiru Servisu Protesaun Sivíl rejista uma-ka’in 12 mak hetan estragus husi Anin.
“Hafoin akontesimentu ami tuun ba terenu hodi haree kondisaun direita katak, durante ne’e anin maka’as iha loron hirak ba kotuk rezulta anin estraga uma komunidade hamutuk 12 iha munisípiu Covalima,” dehan Xefe programa PSJDN Munisípiu Covalima tersa ne’e, (08/02).
Nia mós dehan, “Ita halo intervensaun hodi identifika loloos motivu husi uma monu hirak ne’e iha terenu hatudu katak, uma sira ne’e monu tanba anin mak estraga. uma sira ne’e balun aat total no balun at kaman, maibé ohin ekipa mós kontinua tun ba terenu kontinua atu identifika anin estraga uma komunidade sira iha Covalima,” Hateten Nia
Maske ekipa identifika no rejista ona anin estraga uma komunidade 12 iha postu administrativu ne’ebé pertense ba munisípiu Covalima, maibé to’o ohin loron seidauk hetan apoiu emerjénsia, tanba ne’e iha posibilidade semana ne’e sei fó apoiu emerjénsia ba vitima sira.
“Vitima hirak ne’e seidauk hetan apoiu emerjénsia tanba situasaun udan no anin maka’as, ita tun ba terenu uza motoriza la’ós ho kareta, nune’e ita seidauk fó apoiu emerjénsia posibilidade iha semana ne’e sei apoiu emerjensia sira hanesan foos item non food item ba vitima sira,” Nia Hakotu.
Entretantu uma 12 ne’ebé hetan estragus husi anin ne’e pertense ba postu administrativu Fatululik uma rua, postu Fohorem uma-ka’in neen, husi suku Datololu uma-ka’in haat no Fohorem Vila uma rua, postu administraivu Tilomar uma ida no postu Zumalai uma rua.(*)
