Tempotimor (Covalima)-Kondisaun estrada ne’ebé liga husi postu administrativu Maucatar ba postu administrativu Fatululik no munisípiu Bobonaru kontinua aat nune’e kontinua difikulta komunidade husi postu Fatululik, Maucatar inklui Munisípiu Bobonaru susar lori produtu lokál ba merkadu.
Reprezentante komunidade husi postu Maucatar, Serafin Amaral husu ba Ministériu Obras Públika iha nasionál atu ateru tiha Estrada ne’ebé aat, atu nune’e transporte bele asesuhodi transporta produtu komuniade nian ba merkadu.
“Agora tempu udan hanesan ne’e kareta labele halo movimentu só motor mak bele halai ba Suai, tanba kondisaun estrada aat tebes, ne’ebé ami husu ba obras públika sira bele ajuda emerjénsia ida hodi ateru netik rai mutin ruma, nune’e kareta bele halai ba mai no ami-nia produtu oan sira ne’e ami bele fa’an iha merkadu Suai,” dehan Serafin Amaral ba www.tempotimor.com hafoin la’o ain husi suku ba Merkadu Suai, Horseik (19/02).
Serafin akresenta, iha tinan 2021 Programa Mão-de-Obra komunidade kada Aldeia ida-idak taka ona rai mutin ba estrada aat, tanba ne’e kareta bele halo movimentu, maibé tempu udan kontinua sobu filafali.
“Iha tinan kotuk ne’e programa ida naran Mão-de-Obra ne’e ami komunidade halo servisu hodi rai taka ona kuak sira ne’e, ne’ebé kareta halai di’ak, maibé agora tempu udan fali be mota ki’ik tun lori hotu rai sira ne’ebé mak ami ateru sira ne’e, ne’ebé estrada komesa kuak naruk boboot iha dalan sira hotu, rai kuak boot hanesan ne’e hahú husi Suai mai to’o Maucatar ba to’o Fatululik no ba liu munisípiu Bobonaru, ne’ebé kareta ne’e labele halai iha tempu udan hanesan ne’e,” nia tenik.
Iha sorin seluk, motorista Agustino Mali sente triste tebes ho kondisaun estrada liga ba postu rua no ba munisípiu Bobonaru, tanba kada tinan komunidade sempre halerik ba estrada.
“Ami hanesan komunidade sente triste tebes ho kondisaun estrada ne’e tanba kada tinan mak ami ko’alia no halerik hela de’it ba estrada oan ne’e, ne’ebé estrada ne’e bainhira loos mak atu hadi’a halo di’ak loos, ami husu de’it mak estrada ne’e estrada ne’e di’ak ona, entaun ami bele lori ona ami-nia produtu lokál hodi asesu ba merkadu no buat hotu, maibé estrada kondisaun hanesan ne’e kareta la halai oinsa mak ami bele fa’an mai-nia produtu lokál iha merkadu,” Hateten Agustino Mali.
Entertantu produtu lokál ne’ebé komunidade husi postu administrativu Fatululik no Maucatar mak hanesan Kamí, Fore rai, bua no produtu seluk tan.(*)
