Tempotimor (Covalima)-Ekipa Task Force husi beaço munisípiu Vikeke sente kontente hafoin halo estudu komparativu iha munisípiu Covalima liga ho projeitu tasi ne’ebé afeta mós povu Beaço.
“Ami kontenti tanba buat ne’ebé ami hetan iha ne’e, sei esplika ba komunidade sira iha ne’eba,” dehan xefe ekipa Task force Beaço, Fransisco Amaral iha Suai, Tersa (22/02).
Iha estudu komparativu ne’e xefe ekipa rekuinese importánsia husi estudu ne,e no sei haklaken saida mak hetan ona ba komunidade sira iha munisípiu Viqueque.
“Nune’e ami bele hatene imformasaun husi ne’e no komunidade sira ne’ebé uluk afeita iha Suai ba projetu ne’e, entaun sira ne’ebé afeta ne’e ami husu hela ho dignu ka lae? maibé ami haree uma di’ak no komunidade sira hela agora ho dignu tebes,” Nia tenik.
lha sorin seluk Diretór Projetu Tasi Mane, Fransisco Fereira hatete, komunidade sira husi munisípiu Vikeke halo estudu komparativu iha Covalima tanba modelu impelemntasaun projetu hanesan sei implementa mós iha Beaço Vikeke.
“Sira mai halo estudu komparativu iha ne’e, tanba projetu iha ne’ebá mós atu hanesan iha Suai ne’e, tanba ne’e sira haree komunidade ne’ebé uluk afeta ba projetu hanesan aeroportu no auto estrada no perfurasaun mina iha ne’e, ekipa Task Force mai sei haklaken buat ne’ebé haree ho matan no husu direta iha terenu ba komunidade sira ne’ebé mak afeta ne’e, ne’ebé buat ne’e sira hetan iha Covalima sei pasa ba nia komunidade iha Vikeke tanba tempu badak governu halo levantamentu dadus iha Beaço, entaun Timor Gap lori ekipa Task Force reprezenta komunidade mai vizita progresu iha munisipiu Covalima,” Nia informa.
Entertantu iha estudu komparativu ne’e vizita bairu foun, rate ne’ebé halo foun ne’ebé molok ne’e afetadu husi Aeroportu Internasional Kayrala Xanana Gusmão nomós halo observasaun jerál iha posu Liurai suku Camanasa.(*)
