Tempotimor (Covalima)-Liga ba akontesimentu udan boot no korente mota ne’ebé maka’as hodi sobu ponte Raiketan no Lo’omea mak komunidade husu governu liliu Ministériu Obras Públika (MOP) atu hadi’a emerjénsia, maibé Obras Públika (OP) munisípiu Covalima ‘rende’ tanba orsamentu laiha hodi atende.
Tuir Diretór Obras Públika Munisipiu Covalima, Alberto Cardoso katak, orsamentu laiha hodi hadi’a ponte rua ne’ebé segunda kalan hetan estraga husi korente mota nian.
“Ami iha munisipiu laiha orsamentu atu halo atendementu emerjénsia ba ponte ne’ebé mota sobu hodi normaliza,” Hateten Diretór Alberto Cardoso ba www.tempotimor.com iha knaar fatin, Kuarta (23/02).
Nia hatutan, hafoin akontesimentu ne’e, Obras Públika husi munisípiu hato’o ona ba Institutu Geral Estadu (IGE) liuhusi telefone no karta hodi normaliza ba ponte refere.
“Ita fó hatene ona ba IGE hodi halo normaliza, ami mak iha munisípiu ne’e la halo buat ida, tanba laiha orsamentu no laiha ekipametus hodi atendementu emerjénsia, ne’ebé buat hotu ami kontaktu de’it ba naionál, ami nia esforsu mak halo kontaktu no halo karta ona ba IGE hodi halo normaliza ne’e,” katak Nia.
Diretór ne’e mós fiar katak, tempu besik IGE sei sormaliza ba ponte rua refere, mezmu la’ós ho emerjénsia. Tanba ekipamentus balun avaria hela.(*)
