UNARCO Kuda Ai-oan 200-Resin iha Debos

Tempotimor (Covalima)-Uniaun Agrikultura Munísipiu Covalima (UNARCO) hamutuk ho organizasaun sira no autoriedade Covalima kuda ai-oan 200-resin iha suku Debos hodi prezerva bee-matan.

Tuir prezidente UNARCO, João Gusmão katak, objetivu husi kuda ai-oan ne’e atu prezerva bee-matan sira, nune’e tama ba tempu bailoron bee iha fatin refere labele maran.

Read More

“Kuda ai-oan ne’e atu prezerva konservasaun ba bee no rai, tanba antes ne’e mós UNARCO hamutuk ho PARMATIL halo uluk ona konservasaun ba bee no rai iha aldeia refere,” Prezidente UNARCO João dehan ba jornalista sita hafoin remata kuda ai-oan iha aldeia Lokeu, suku Debos, Kinta (31/03).

Iha tempu hanesan Administradór Postu Administrativu (APA) Suai, Luzinho do Rego husu ba komunidade iha aldeia Lokeu atu kuidadu no proteje didi’ak ai hirak ne’e atu nune’e labele hetan estragua husi animál tantu ema.

“Atividade kuda ai-oan ne’ebé implementa husi UNARCO no organizasaun sira ne’e atu prezerva bee-matan ba futuru labele maran, tanba ne’e husu ba komunidade sira atu kuidadu ba ai-oan sira ne’e,” dehan Administradór Luzinho.

Ai-oan hirak ne’e prepara rasik husi UNARCO, no ai-oan hirak ne’e mak hanesan Ai-hedan hamutuk hun 100, Ai-kakeu hun 50, Ai-kiar hun 5 inklui ai seluk ne’ebé liu atus rua mak kuda iha fatin refere.

Alende UNARCO implementa atividade kuda ai-oan iha aldeia Lokeu, atividade konservasaun kontinua hala’o ba bee no rai iha aldeia Hatu, Suku Holpilat, Postu Administrativu Maukatar.

Entretantu partisipa iha atividade kuda ai-oan ne’e mak UNARCO, Organizasaun Kadalak Sulimutu, PARMATIL, Instituisaun Edukasaun Populár no akompaña husi Administradór Postu Administrativu Suai.(*)

Related posts