Tempotimor (Covalima)–Situasaun Pandemia COVID 19 ne’ebé forma husi variante oioin, mak governu Timor-Leste liuhusi Ministériu Saúde (MS) kontinua hasa’e imunidade komunidade nian liuhusi vasina.
Liga ba kestaun ne’e, responsável postu saúde Ogues, Carlos da Cunha Miniz katak, estudante husi Eskola Bázika Centrál (EBC) Ogues no Eskola Tékniku Vokasionál (ETV-Cristál) hamutuk na’in 318 mak simu ona imunizasaun husi vasina pfizer.
“Estudante sira ho idade 12 to’o 18, iha loron 31 fulan marsu ne’e estudante sira simu ona vasina doze dahuluk hamutuk na’in 318, ne’ebé estudante husi EBC Ogues no ETV Cristal Suai,” Carlos dehan ba jornalista, iha salaun Administrasaun Covalima, Kuarta (06/04).
Estudante hira ne’e na’in 249 mak husi EBC Ogues ne’ebé kompostu husi estudante mane 123 no feto 126, enkuantu estudante husi ETV Cristal Suai hamutuk 69 ne’ebé kompostu husi feto na’in 44 no mane 25.
Nia afirma, liga ho vasinasaun ne’e ekipa pesoál saúde Covalima hetan krítika oioin husi inan-aman estuda sira, maibé buat hotu la’o ho di’ak.
“Ami pesoál saúde simu krítika husi inan-aman husi estudante sira, maibé ami halo esplikasaun ba sira kona-ba benefísiu husi vasina atu prevene oan sira husi moras COVID 19 ne’ebé agora dadaun mundu tomak preokupa,” katak Carlos.
Antes ne’e, iha loron 17 marsu fulan kotuk, diretora servisu saúde Covalima Maria Fátima Moniz hateten, servisu saúde distribui ona vasina Pfizer ba postu administrativu sira hanesan postu Fatumea vial 13, Fatululik vial 10, Fohorem vial 10, Maucatar vial 14, Suai vial 88, Tilomar vial 28 no Zumalai vial 20.
Entertantu stoke vasina ne’ebé servisu saúde Covalima simu husi nasionál hamutuk vial 200 ne’ebé distribui ona ba sentru saúde hitu iha munisípiu covalima.(*).
