Tempotimor (Covalima)-Administradór Munisípiu Covalima (AMC), Francisco de Andrade enkoraja komunidade Covalima atu matein pás no estabilidade maske kandidatu ida tenke derota, maibé husi rezultadu eleisaun povu laiha manan no lakon
“Eleisaun ida ne’e laiha ida mak lakon, maibé bazeia ba rezultadu kandidatu na’in rua ne’e ida mak sai vensedór, ita hotu nia prezidente, ita hotu timoroan iha kolaborasaun nafatin, ita tenke unidade, kria pás no estabilidade,” dehan Autoridade Covalima ne’e ba jornalista sira, iha Kampung-Baru, Horseik (21/04).
Eleisaun la’ós ba Prezidente Repúblika (PR) de’it, maibé sei realiza mós Eleisaun Parlamentar tinan 2023, nune’e povu Covalima tenke mantein pás no estabilidade
Durante realiza eleisaun prezidensiál segundu volta iha Covalima la’o ho susesu kompara ho munisípiu seluk. Tanba esforsu hosi autoridade hotu hodi kumpri asina paktu unidade ne’ebé realiza iha CNE Covalima.
“Ba oin ita-nia estabilidade pás no trankilidade la’o atu ema Covalima bele iha unidade,” Nia hateten.
Enkuantu Komisaun Nasionál ba Eleisaun (CNE) realiza serimónia hodi asina paktu unidade iha loron 23 fevereiru 2022. Ho objetivu atu hametin pás no estabilidade iha Covalima, nune´e iha períodu kampaña eleitorál no eleisaun bele la´o ho hakmatek.
CNE haktuir ba atribuisaun kompeténsia husi artigu 65, Konstituisaun RDTL prevé iha pontu 2, artigu 11, lei nú 7/2016, lei ba Orgaun Administrasaun Eleitorál, hateten Estrutura Orgánika Sekretariadu permanente CNE nian sei aprova tuir lei, no pontu 3 hosi artigu refere, hatete CNE mak sei elabora no aprova rejimentu ba sesaun plenária sira, ne’ebé tenke publika iha série II do Jornal da Repúblika.(*)
