Tempotimor (Covalima)-Relasiona ho sasan ne’ebé folin sa’e maka’as iha teritóriu Timor-leste tomak inklui merkadu Suai, maka komunidade husu ba governu atu buka solusaun ba problema refere.
Negosiante Domingas Amaral afirma, folin fos iha merkadu Suai folin ho kilograma 25 sa’e ona ba dollar $14.50 maske antes ne’e folin husi dollar $12.50 to’o $13.50.
“Sasan folin sa’e ne’e durante fulan ida ona, agora ne’e sa’e maka’as los, sasan folin sa’e ne’e, la’ós ami mak hakarak, ma’ibé ne’e husi merkadu nasionál kedas, agora ami fa’an fos ne’e ho folin dollar $13,50 to’o $14,50, tamba ami sosa fos ne’e iha Dili, balu ho folin dollar $13,25 no balu mós iha folin $14,25, hanesan ho mina nia folin, uluk mina goreng litru lima ne’e $ 5,00 de’it, maibé agora ami fa’an mina litru lima, ne’e ba iha dollar $10, 00, tamba ami hola kaixa ida ho folin dollar $38,00,” dehan negosiante merkadu Suai, Domingas ba jornalista sira iha ninia loja, Kinta (21/04).
Iha sorin seluk kompradór Martinho Noronha dos Santos tristi ho sasan folin ne’ebé sa’e makas tanba fó impaktu negativu ba nesesidade komunidade nian lor-loron.
“Hanesan kompradór ha’u senti triste ho sasan folin ne’ebé sa’e maka’as tebes, tanba fó impaktu mai ami kompradór sira liliu iha munisípiu Covalima, tanba kompradór barak mak senti araska atu hola fos, mina no seluk seluk tan,” nia dehan.
Nia husu ba governu atu buka lalais solusaun ba problema folin sasan sa’e ne’ebé povu infrenta iha merkadu.
“Ha’u hakarak husu de’it ba governu oinsa atu solusiona lalais problema hirak ne’ebé povu Timor infrenta, tanba ne’e governu tenki buka solusaun atu nune’e povu labele moris terus,” Nia rekomenda.(*)
