Tempotimor (Covalima)-Sexta-feira (20/05/2022) mestre ba serimónia komemorasaun 20 de maiu no Restaurasaun Independénsia tinan XX Timor-Leste nian iha Covalima mosu estrañu tanba mestre ba serimónia duni sai média nasionál no lokál iha kampu serimónia nian.
Liga ba kestaun ne’e, jornalista Rádio Comunidade Cova Taroman (RCCT), Joana Cardoso la satifeitu ho atetudi husi MC ne’ebé hakilar média sira kampu serimónia nian.
“MC Jacinta hatudu nia atitude hanesan ne’e, iha ordem ruma husi ita-nia mai ulun sira ka oinsa, antes ne’e la fohatene kedas ami atu nune’e ami labele halo movemintu, ami ne’e média, ami nia dever mak ida ne’e, tamba sá nia hakilar ami hanesan ema brutalizmu ne’ebé ba sobu serimónia. Karik MC Jacinta la gosta prezensa média iha serimónia, favor lalika hakilar iha públiku, tamba ami mós ema hanesan nia no ami mós iha digindade,” Jornalista RCCT ne’e dehan ba www.tempotimor.com iha Kampu Ladi, Sesta (20/05).
Iha sorin seluk Koordenador UNPAZ Covalima, Silvestre Ferreira mós diskurda ho atitude protokolu ne’ebé duni sai jornalista sira iha fatin públiku.
“Nu’udár akadémika sente triste, tanba MC lahatene média nia servisu to’o la respeitu jornalista sira. Maibé husu para iha eventu sira tuir mai, koordena ho di’ak, tanba servisu média ne’e livre iha situasaun hanesan ne’e,” Nia informa.
Enkuantu observasaun iha terenu harudu katak, bainhira Reprezentante Prezidente Repúblika (PR) Timor-Leste, Sekretáriu Estadu Ambinte (SEA), Demétrio do Amaral halo leitura ba diskursu PR nian iha serimónia solene ne’e, derepente mestre ba serimónia hakilar no duni jornalista sira bainihra jornalista sira halo hela gravasaun ba imajen.
“Favor ida média sira retira husi kampu ne’e, há’u husu jornalista sira sai husi fatin ne’e kedas,” MC ho naran inisiál JdC ne’e hakilar dala tolu ho lian maka’as ba jornalista sira.
Alende ne’e, Komisaun Organizadora ba eventu ne’e mós la prepra fatin ba média sira hodi halo kobertura. Nune’e jornalista sira ne’ebé MC duni sai husi kampu serimónia mak jornalista husi RTTL, TATOLI, Rádiu Comunidade Cova Taroman (RCCT) no Tempo Timor no seluk tan.(*)
