Tempotimor (Covalima) – Xefe Departamentu Reprezentasaun Territoriál Floresta no Planta Indústria Munisípiu Covalima, Francisco Sarmento, hateten atividade negósiu Ai-teka iha munisípiu refere kontribui ona reseita rihun 8-resin ba kofre estadu.
“Ida-ne’e ami bolu dehan katak lisensa negósiu, luiliu ba maluk Covalima oan sira-ne’ebé halo negósiu iha Ai-teka espésie atus haat resin haat (404) kúbiku, hamutuk hatama osan ba kofre estadu $.8.080.00 dóllar amerikanu,” nia informa ba Tempotimor iha munisípiu Covalima, kinta (21/01).
Nia dehan, iha semana kotuk Guarda Floresta Nasionál munisípiu refere manda ona resivu ba Xefe Departamentu Reprezentasaun Teritorial Floresta munisípiu refere.
Nia hatutan, reseita ne’e guarta floresta sira rekolla iha tinan 2020 liubá.
Nia fó-sai katak, iha fulan abríl no maiu 2020 la hatama reseita tanba Timor-Leste aplika hela Estadu Emerjénsia (EE).
Nia hateten, kada hatama reseita ba kofre Estadu ne’e ba sira-ne’ebé iha lisensa negósiu maibé komunidade sira halo uma privadu no halo uma lulik sira-ne’e la Selu, maibé komundade sira tenke hasai deklarasaun husi autoridade lokál sira.
“Ko’a Ai ho tipu rua, ko’a ida mak uza sosiál ba komunidade sira-ne’ebé mak kbiit mak laiha duni no ami mós haree direita katak komunidade ne’e laiha forsa duni atu halo nia uma, ne’e ami ajuda. Rua mak ba sira ne’ebé mak halo negósiu ai tenke selu tanba sira-ne’e presiza ai barak,” (*)
