Tempotimor (Covalima) – Estudante Eskola Bázika Sentrál (EBC:sigla portugés) Ogues, hahú hala’o prosesu aprendizajen, iha loron 18 fulan janeiru liubá.
Diretór Eskola Bázika Sentrál Ogues informa, reativa atividade eskolár ne’e, bazeia despaixu husi Ministériu Edukasaun, Juventude no Desportu (MEJD) nian, maibé nafatin kumpri regra preventiva, ne’ebé estabelese ona, tuir regulamentu Ministériu Saúde (MS) no Organizasaun Mundiál de Saúde (OMS) nian, durante Estadu Emerjénsia (EE), hanesan fase liman ho sabaun, uza maskára, distansiamentu sosiál no fízika, relasiona ho pandemia Covid-19.
“Despaixu Ministériu Edukasaun númeru 1/2021 orienta diretór eskola sira hotu katak, tenke komesa aula ka prosesu aprendizajen,” dehan Diretór Eskola Bázika Sentrál Ogues, Saturnino Barros, ba www.tempotimor.com, iha Covalima, Segunda (18/01)
Alende ne’e, Saturnino Barros akresenta, eskola mos iha regra, atu diminui númeru profesór no estudante sira durante iha aula laran no husu atu profesór no estudante sira bele kumpri, nune’e fásil hodi kontrola.
Maibé Diretór EBC Ogues sente preokupa, tanbá eskola refere enfrenta problema, mak susar atu aplika distansiamentu sosiál ka fízika, tanba númeru estudante iha eskola ne’e, iha estudante atus-hitu-resin (700 resin), tanbá ne’e difísil atu aplika.(*)
