Tempotimor (Covalima) – Servisu Agrikultura no Peska Munisípiu Covalima, rejista to’os Batar ektare 600-resin mak hetan atake husi peste gafañotu.
“Ami rejista peste gafañotu estraga komunidade nia to’os Batar ektar 600- resin Iha Covalima no to’os lubuk ida mak husi peste ataka liuliu ba batar ninian,” Diretór Servisu Agrikultura no Peska Munisípiu Covalima Jeferino Guterres ba Tempotimor iha nia fatin servisu, iha Covalima, kuarta (28/01).
Nia dehan, Sevisu Agricultura Covalima halo ona intervensaun balu maibé aimoruk ne’ebé apoia hosi Ministériu Agrikultura no Peska (MAP) limitadu.
Diretór Jeferino Guterres, hateten distribui ona aimoruk ba postu hitu (7) maibé aimoruk lato’o atu rega peste ne’e.
‘’Aimoruk ne’ebé mak ita distribui ona provizoriamente iha de’it aimoruk oin ida, naran dusma bele rega ba batar sira, halo ular oan sira-ne’e mate, aimoruk seluk governu sentrál seidauk distribui mai,” nia katak.
Nia hatutan, aimoruk ne’ebé iha rezerva husi tinan 2020 nian.
Iha sorin seluk to’os na’in, Angelo Cardoso husi Suku Suai Loro, Aldeia Lo’o, esplika situasaun ne’ebe sira hasoru defísil atu kombate peste ne’e.
“Ami kuda batar iha fulan-dezembru nia laran, iha fulan-janeiru ne’e batar ne’e atu fulin ona mas ular oan ne’e komesa haan batar hela de’it nia kain. Ami triste bo’ot,” dehan Angelo ba www.tempotimor.com.
Nia hateten, batar ne’ebé kuda ho medida naruk 80 no luan metru 40.
Nia husu Governu atu fahe aimoruk nune’e bele regra peste ular no gafañotu ne’e.
Agrikultór ne’e fó hanoin ba Governu liuhusi MAP atu halo intervensaun urjénsia no rapidamente.
“Sé bele tempu badak nia laran bele fahe ba ami, nune ami bele rega ular sira-ne’e nune’e labele estraga ami-nia batar,” Angelo fó hanoin ba Ministru Agrikultura no Peska Pedro dos Reis. (*)
