Tempotimor (Covalima)-Atu prevene no kombate Covid-19 maka ekipa Cruz Vermelha Timor-Leste (CVTL) munisípiu Covalima kontinua tama sai bairru hodi fahe informasaun ba komunidade sira liuhusi distribuisaun brosura kona-ba prevensaun Covid-19 nian.
Tuir Koordenadór CVTL Covalima, Domingos G. Amaral ekipa CVTL halo kampaña no fahe brosura ba komunidade sira iha aldeia Tudulpo, tanba komunidade sira la asesu ba eletrisidade inklui susar ba rede telekomunikasaun Timor Telekom, Telemor no Telkomsel.
“Bainhira udan komunidade aldeia Tudulpo labele asesu ba merkadu tanba estrda ladi’ak no hakur mota rua, ne’ebé tempu bai-loron hanesan ne’e aproveita fahe informasaun ba prevensaun moras Covid19 ne’e no fahe brosura ba komunidde hodi lee nune’e bele taka iha didin lolon, tanba sira la asesu eletrisidade ne’ebé la asesu informasaun husi televisaun no rede telefone laiha oinsa bele rona informasaun ne’ebé entaun susar tebes, tanba ne’e mak área rurál sira ne’e ami tarjeitu hodi fahe informasaun,” dehan Domingos ba www.tempotimor.com iha aldeia Tudulpo, Kuarta (12/5).
Iha fatin hanesan reprezentante komunidade Tudulpo Juvanio Carvalho Moniz agradese tebes ho prezensa CVTL nian, Tanba liuhusi sira bele asesu informasaun kona-ba oinsa halo prevensaun ba Covid-19.
“Ami kontenti tebes ho ekipa CVTL nia prezensa ba loron ohin, tanba bele fahe ona imformasaun mai ami kona-ba moras pandemia Covid-19, durante ami rona tutan de’it husi maluk sira no oan sira eskola iha vila fila mai mak fo hatene ami, maibé ohin sira bele to’o iha ne’e, entaun ami kontente tanba atu nonton ija televizaun mós ladi’ak tanba ami la asesu eletrisidade,” hateten nia.
Entertantu aldeia Tudulpo hola parte ba suku Beco postu Suai ne’ebé iha populasaun hamutuk uma-ka’in 32, ne’ebé nia distánsia husi suku Beco ba aldeia Tudulpo kuaze kilómetru hitu, tanba ne’e governu presiza tau atensaun ba povu aldeia Tudulpo tanba husi ukun-aan to’o agora komunidade sira seidauk sente saida mak ukun-aan no dezenvolvimentu.(*)
