Tempotimor (Covalima)-Liga dezastre naturais ne’ebé mosu hodi hakotu estrada inklui estraga komunidade sira-nia rezidénsia no aihan sira, maka servisu Obras Públika munisípiu Covalima entrega ona dadus sira ba Instititu Jestaun no Ekipamentu (IJE) hodi atende ba estrada no ponte balun ne’ebé hetan estragus.
Diretór Obras Públika Covalima, Alberto Cardoso katak, relatóriu estragus ne’ebé iha enkamiña ona ba IJE para oinsa bele halo intervensaun.
“Dalan no ponte ne’ebé mak kotu no monu iha fulan kotuk iha munisipiu Covalima, ne’ebé impaktu husi inundasaun iha postu Fatumea no postu seluk ami hato’o ona ba Servisu Jestaun Equipamentu (IGE) ne’ebé tempu badak sira sei hadi’a,” dehan Alberto ba www.tempotimor.com iha nia knaar fatin, Kinta (13/5).
Directur ne’e akresenta, kona-ba bainhira mak halo intervensaun ba estrada no ponte sira ne’e depende ba IJE.
“Ami obras públika munisípiu Covalima halo ona intervensaun ne’ebé depende de’it ona IJE atu bainhira mak hadi’a ne’e sira mak iha kompeténsia ona, ne’ebé ami hein de’it informasaun husi sira hodi halo monitorizasaun,” dehan Nia.
Entertantu inundasaun ne’ebé estraga estrada, ponte inklui komunidade sira-nia uma no aihan sira ne’e akontese iha loron 4 Abril tinan ne’e, nune’e estrada ne’ebé kotu hamutuk 6 ne’ebé balun iha postu Tilomar, Fatumea inklui ponte Lo’o mesa sorin mak monu ne’ebé parte IJE halo ona intervensaun ba ponte refere.(*)
