Tempotimor (Covalima)-Sosiedade sivíl hamutuk 11 iha munisípiu Covalima realiza enkontru iha edifisiu Cruz Vermelha Timor-Leste (CVTL) Covalima hodi reativa hikas atividade prevensaun Covid-19 iha munisípiu refere.
Koordenadór Cruz Vermelha Timor-Leste (CVTL) munisípiu Covalima, Domingos G. Amaral katak, objetivu sorumutu ne’e hodi ko’alia kona-ba oinsá atu apoiu Ministériu Saúde (MS), halo kampaña kona-ba oinsá prevene Covid-19 iha sosiedade nia leet.
“Objetivu enkontru ho ita-nia maluk sosiedade sivíl iha munisípiu Covalima reativa fali atividade prevensaun Covid-19, hanesan halo kampaña tama sai komuniadde inklui fahe brosura sira,” dehan koordenadór CVTL ne’e ba www.tempotimor.com, Sesta (21/5).
Iha fatin hanesan, Diretór Centru Comunidade Covalima (CCC) Alberto de Jesus Barros agrdese ba sosiedade sivíl iha munisípiu Covalima, tanba bele servisu hamutuk hodi kombate virus refere.
“Ida ne’e oportunidade di’ak ba ita sosiedade sivíl iha munisípiu Covalima, hatudu komitmentu hodi halo dezemvolvimentu iha munisípiu Covalima inklui atividade kona-ba prevensaun Covid-19,” Hateten Nia
Sosiedade sivil ne’ebé eziste iha munisipiu Covalima mak Centru Comunidade Covalima (CCC), World Vision, Unarco, Rede Covalima, Fini Esperansa, HLT, RHTO, CJC, HAKOM no CVTL rasik.
Entretantu, dadaun ne’e kazu komulativu Covid-19 iha munisípiu Covalima hamutuk 147. Husi númeru ne’e na’in 129 kontinua ativa, na’in 18 mak rekopera ona inklui ohin ekipa saúde detekta tan kazu foun hamutuk hitu. Ne’ebé kazu komulativu Covid-19 iha Timor-Leste atinje ona rihun 5.287.(*)
