Fasilidade Koziña Iha EBC Dato-tolu Aat Dadaun

Diretor EBC Datotolu Adão da Cruz hato'o hela preokupasaun EBC Dato-tolu ba Diretor Edukasaun Munisipiu Covalima. Kuarta (09/06). Foto Tempo Timor

Tempotimor (Covalima)-Tuir diretór Eskola Básika Central (EBC) Dato-tolu Adão da Cruz katak, fasilidade merenda eskolár nian hanesan sana, tasu no bikan komea aat ona.

“Materiál dapur ne’ebé utiliza iha EBC Dato-tolu ba merenda eskolár hanesan bikan, kanuru, sana no tasu kuak hotu no rai malirin halo bikan nia laran metan hotu, tanba ne’e husu ba administradór munisípiu no diretór Edukasaun Munisípiu Covalima atu hato’o proposta ruma ba Ministériu kompetente atu ajuda materiál te’in nian,” katak diretór Adão ba www.tempotimor.com, Kuarta (09/06).

Lee Notisia Seluk

Iha parte seluk, Diretora Eskola Básika Central (EBC) Salele, Elda de Fátima mós dehan, EBC Salele mós infrenta problema hanesan, tanba ne’e husu ministériu edukasaun munisípiu Covalima atu responde ho lalais.

“Se bele responde ho lalais kona-ba preokupasaun ne’ebé eskola hasoru, hanesan bikan, kanuru no seluk tan,” katak nia.

Alende ne’e diretór Edukasaun Munisípiu Covalima (EMC) Edmundo Ferreira rekoñese katak, iha duni problema ba fasilidade, tanba ne’e iha tempu badak EMC sei enkamiña ba Ministériu Edukasau Munisípiu Juvetude no Desportu (MEJD).

“Sim, loos duni, tanba tinan barak mak eskola sira iha munisípiu Covalima uza materiál koziña sira ne’e, maibé husu ba diretór eskola sira halo to’ok jestaun ba orsamentu merenda eskolár, se la to’o ba mak halo proposta ida mai ami, depois ha’u sei hato’o ba MEJD kona-ba preokupasaun eskola sira nian ne’e,” nia tenik.

Entertantu, partisipa iha sorumutu ne’e mak diretór EBC sira husi husi postu administrativu Fohorem, Fatumea no Tilomar.(*)

Notisia seluk