Tempotimor (Covalima)-Centro Comunidade Covalima (CCC) hamutuk ho Servisu Saúde Munisípiu Covalima (SSMC) sensibiliza informasaun kona-ba vasinasaun kontra Covid-19 no violénsia doméstika hasoru feto ba estrutura konsellu suku sira iha Covalima.
Objetivu husi divulgasaun informasaun ne’e atu fahe informasaun ba isu prioridade sira hanesan vasinasaun no lei kontra violénsia doméstika, nune’e bele haforsa liután koñesimentu komunidade sira.
“Enkontru ida ne’e atu fahe informasaun ba grupu tarjeitu sira ne’ebé hela iha área rural, nune’e fahe informasaun ba sira ne’ebé seidauk asesu informasaun kona-ba Covid-19 no informasaun kona-ba violénsia doméstika,” Hatene reprezentante Diretór CCC, Graciano Gusmão iha salaun sentru komunidade Covalima, Kuarta (16/06).
Iha fatin hanesan, xefe programa Servisu Saúde Munisipiu Covalima (SSMC) Agapito de Jesus husu ba konsellu suku no grupu tarjeitu sira iha postu administrativu hitu munisípiu Covalima nian atu hala’o servisu iha kooperasaun nune’e bele simu vasina kontra Covid-19.
“Husu ba ita boot sira hatutan informasaun ba komunidade sira tenke hakbesik aan ba saúde hodi simu vasina, nune’e ita bele sai husi korente Covid-19, tanba iha Munisípiu Covalima agora númeru pozitivu Covid-19 sa’e ona ba 237 maske seidauk iha mate, tanba ne’e nafatin kumpre regras Organizasaun Saúde Mundial (OMS) no Ministériu Saúde (MS), tanba kazu kontinua aumenta,” dehan Agapito.
Entertantu partisipante sira ne’e mai husi grupu tarjeitu iha postu administrativu hitu, mak hanesan grupu Tialai, Haburas Maudemo, Halal, Remajelelu, Goronto, Feto Foinsa’e, Kruz Mina Rai, Halibur Maudemo. Nue’e totál partisipante iha enkontru ne’e hamutuk 42 iha Salaun Centru Comunidade Covalima.(*)
