Tempotimor (Covalima)-Administradór munisípiu Covalima, Francisco de Andrade husu ba komunidade Covalima atu iha konsiénsia hodi simu vasina AstraZeneca, tanba governu nia luta mak hakarak hakotu korente Covid-19 nian iha Timor-Leste liliu iha munisípiu Covalima.
“Husu imi ida-idak nia konsiénsia atu simu segundu faze vasina, atu nune’e bele hakotu korente Covid-19 iha ita-nia munisípiu Covalima ne’e, imi ho ami nafatin koperasaun servisu no kolaborasaun ne’ebé di’ak,” dehan Administradór Francisco ba www.tempotimor.com iha lansamentu ba vasina AstraZeneca doze daruak nian, Segunda (14/06).
Iha sorin seluk diretór Servisu Saúde Munisípiu Covalima (SSMC), Filipe Pereira Lemos katak, segundu fase sei fó prioridade ba ekipa frotline sira ne’ebé molok ne’e simu ona doze dahuluk.
“Lansamentu segundu faze vasina AstraZeneca ne’e ba frontline sira, depois segundu faze ita hahú kedas ho sira ne’ebé idade 70 ba leten, nune’e ita bele hetan imunidade di’ak hodi nune’e ita bele kontra Covid-19,” katak ni.
Entertantu lansamentu segunda faze vasina ne’e, funsionáriu saúde no funsionáriu administrasaun munisípiu inklui ekipa segunransa parte Polísia Nasionál Timor-Leste (PNTL) no Falintíl Forsa Defeza Timor-Leste (F-FDTL) hamutuk ema na’in 36 mak simu oa vasina ba doze daruak iha administrasaun munisípiu Covalima.(*)
