Tempotimor (Covalima)-Tuir xefe aldeia Loro, suku Suailoro, Santina de Jesus katak, nu’udar to’os na’in lori Xa Rosella mak sustenta nesesidade familia inklui hodi selu mós oan sira-nia eskola.
“Ha’u-nia to’os ne’ebé kuda Xa Rosella ne’e maizumenus hektares ida hodi kuda Xa Rosella hun 100, entaun husi ida ne’e mak ha’u sustenta ba hau-nia familia no selu ba oan sira-nia eskola,” Hateten Santina ba www.tempotimor.com iha nia rezidénsia, Suailoro, Kinta (17/06).
Nia mós konta, fini Xa Rosella ne’e hetan husi sosiedade sivíl Parcik, hafoin hala’o parseiru ho sosiedade sivíl Parcik iha tinan hira ba kotuk.
“Fini xa rosella ne’e sosiedade sivíl Parcik mak fahe ba ami, entaun ami lori mai kuda iha ami nia to’os, to’o agora,” katak Nia.
Inan ne’e mós relata kona-ba maneira atu kuda no kuidadu xa rosella iha to’o laran, “prosesu kuda hanesan babain ho distánsia kuda xa rosella ho nia médida 25 sentimetru husi husi ida ba hun seluk, depois kuda remata dader-dader tenke rega hanesan baibain rega modo. Entaun di’ak liu ne’e kuda iha tempu bailoron nunee dader rega akompaña loron matan kona ne’e di’ak liu, depois to’o fulan tolu ha’u foin kolleta, mai habai tanba nia persiza loro-matan, se la habai maka sai dodok hotu,” esplika Santina.
Nia afirma, Xa Rosella la’ós hodi faan ka konsumu de’it, bele mós kura mos moras sira ne’ebé iha ema nia isin lolon hanesan liman ani sin, moras tensaun, kolestról no moras laran sira.
“Xa Rosella iha nia funsaun barak, entaun komunidade barak mak mai sosa iha ha’u-nia uma, ha’u halo bunkus de’it dollar ida nian ba komunidade sira, tanba sira mai hola bebeik, depois balu ha’u planu hela atu rai iha mini market iha Merkadu Suai no balu ha’u planu atu rai iha loja, nune’e sira bele ajuda halo promosaun produto lokál hirak ne’e, tanba agora Xa Rosella sei menus hela ne’ebé ha’u seidauk lori ba loja, tanba Xa Rosella kilo ida $20.00 Amerikanu bainhira lori ba Dili,” dehan nia.
Tuir nia, produtu lokál ne’ebé nia kuda ne’e, hetan ona vizita husi Ogranizasaun la’ós governu Centro Comunidade Covalima (CCC), ne’ebé sei ajuda halo promosaun ba produtu Xa Rosella.(*)
