NGO CCC Halo Ona Pagamentu ba To’os Na’in 37

Komandante PNTL munisipiu Covalima, Superintendente Polisia Antônio Maria de Sá entrega hela osan ba to'os na'in Jucelino da Silva iha sede Suku Lalawa, postu Tilomar. Kuarta (23/06). Foto Tempo Timor

Tempotimor (Covalima)-Kuarta (23/06/2021) ne’e Centro Comunidade Covalima  (CCC), halo ona pagamentu ba to’os na’in 37 ne’ebé durante ne’e kuda ai Mahuni  iha suku Lalawa. postu Administrativu Tilomar, Munisipiu Covalima.

“Ohin ami halo pagamentu ba to’os na’in 37 ne’ebé kuda ai mahoni, entaun kada ai-hun ida ami selu sentavus 0.50, entaun totál orsamentu ne’ebé halo pagamentu ne’e hamutuk rihun $4.120.00, tanba ai-hun hamutuk rihun 8.000 resin,” dehan Diretór CCC, Alberto de Jesus Barros  ba www.tempotimor.com, Ohin (23/06).

Read More

Hafoin halo pagamentu, diretór NGO CCC ne’e husu ba to’os na’in sira atu kontinua koopera no servisu hamutuk, nune’e kontinua kuda ai-oan iha postu Tilomar.

Diretór ne’e mós dehan programa Ho Musan Ida (HMI) ne’e atu dezenvolve komunidade nia moris iha área rurál, liuhusi atividade reflorestasun iha área degradasaun, kria armazén ba karbonu liuhusi kuda ai-horis, hodi hasa’e rendimentu ekonomia família área rurál nian.

Iha fatin hanesan, to’os na’in Jucelino da Silva orgullu ho programa ne’ebé Centro Comunidade Covalima (CCC) hodi halo to’os na’in sira kuda de’it ai mahuni.

“Ha’u kontente no apresia tebes ba programa ne’e, tanba hahú iha tempu okupasaun Indonézia, ha’u hakiak ai-oan, maibé ladun hetan rendimentu, maibé ho programa ida ne’e ami mak hanesan to’os na’in bele hetan rendimentu hodi sustenta família ba nesesidade lor-loron,” katak nia.

Alende ne’e Administradór Munisípiu Covalima, Francisco de Andrade agradese ba to’os na’in sira nomós Centro Comunidade  Covalima ne’ebé halo esforsu hodi kuda ai-oan hodi hatudu rezultadu pozitivu.

“Ha’u fó hanoin ai-oan ida ne’e tama iha kategória ho presu ne’ebé aas, maibé iha Covalima NGO CCC fahe gratuita, tamba ne’e ha’u husu ita boot sira atu la bele fiar voatus, tamba programa ne’e sai hanesan referénsia ba nesesidade família  la depende ba ema ema seluk,” Nia hatete.

Programa “Ho Musan Ida” hahú prosesu iha tinan 2017 no implementa iha tinan 2019 ne’ebé hetan apoiu finanseira husi Uniaun Europeia, Oxfam Austrália no Friends of Suai no hetan apoiu tékniku husi fundasaun Xpand.

Entertantu implementasaun ba programa “Ho Musan Ida” ne’e hala’o iha postu administrativu Tilomar Suku Lalawa, Beiseuk no Casabauc ho nia aldeia sira mak hanesan aldeia Britis, Halimea, Kota foun no Tula-Eduk, Baer, no Tabolo. Nune’e tuir planu programa HMI ne’e sei kontinua ba postu administrativu Fatululik ho Fatumea.(*)

Related posts