Tempotimor (Covalima)-Kinta semana ne’e Konsellu Veteranus Munisípiu Covalima (KVMC) hahú halo levantamentu dadus ba trajédia masakre Pelet ne’ebé hamate timoroan na’in 31 ne’ebé defende Timor-Leste ba ukun rasik aan.
Tuir Prezidente Komisaun Organizadora ba levantamentu dadus, Inosencio Barreto Cardoso katak, aktividade atu halo levantamentu dadus ba masakre Pelet nia inklui identifika mós fatin akontesimentu ka trajédia sira iha postu administrativu Zumalai.
“Ami kria atividades levantamentu dadus ba tragedia masakre iha Pelet ida ne’e hodi halibur dadus ba maluk sira ne’ebé mak mate tan rai ida ne’e tamba intrese ukun aan, lakon sira nia vida. Tamba ne’e ohin loron sira la hamutuk ho ita iha fatin ida ne’e, no durante ne’e ema barak ladun hatene sira mate tamba saida, ema barak mak konfusaun, ne’ebe ohin loron ami selebra loron ne’e, tamba sira subar bandeira Fretilin no lori Ai-han ba Falintil mak militar Indonézia mak oho sira nain 31,” Hateten Prezidente ne’e ba www.tempotimor.com, ohin (24/06).
Nia afirma, orsamentu ba atividades levantamentu dadus trajédia maskre Pelet mai husi komunidade no familia vítima nian.
“Orsamntu ba atividade ne’e hamutuk rihun $2.225 dollar Amerikanu hodi implementa atividades ne’ebé kontribuisaun husi familia vítima, mártires no veteranus sira, funsionáriu no komunidade Zumalai nomós komunidade sira husi postu Suai,” nia dehan.
Nia mós dehan, Masakre Pelet ne’e akontese iha loron 13 fulan-Agostu 1984, iha aldeia Pelet, suku Lour, postu administrativu Zumalai, munisípiu Covalima ne’ebé rezulta timoroan na’in 31 lakon vida, tanba defende bandeira Fretilin inklui lori hahan ba Falintíl sira iha ai-laran.
Entertantu tuir planu ne’ebé komisaun organizadoda iha katak, hafoin levantamentu dadus ba trajédia masakre Pelet sei harii monumentu ba saudosu sira iha Igreja Kimaki, aldeia Pelet ne’ebé prevé ona iha Orsamentu Jerál Estadu iha tinan 2022.(*)
