Tempotimor (Covalima)-Polisia Nasionál Timor Leste (PNTL) Munisípiu Covalima agradese ba populasaun nia kolaborasaun no disiplina ikus mai governu hakotu serka Sanitária (SS) iha munisípiu Covalima.
Tuir Komandante PNTL munisípiu Covalima, Superintendente Polísia António Maria de Sá katak, husi disiplina komunidade nian mak governu hakotu ona serka sanitária iha munisípiu Covalima.
“Ho ita-nia disiplina no kolaborasaun ita-nia domin ne’ebé boot ba ita-nia rai no hadomi ita-nia saúde no ita hotu iha kompromisiu hodi hakotu korenti Covid-19, maka ohin ita-nia munisípiu Covalima livre ona husi serka sanitária,” dehan Komandante António ba www.tempotimor.com iha nia knaar fatin, Sesta (25/06).
Entretantu governu hakotu SS ba munisípiu Covalima iha loron 23 fulan juñu liuhusi reuniaun Konsellu Ministru (KM) iha Dili. Nune’e serka sanitária ba munisípiu Dili no Baucau aumenta tan loron hitu.(*)
