Tempotimor (Covalima)-Relasiona ho liña eletrisidade ne’ebé to’o agora komunidade aldeia tolu iha suku Taroman, postu administrativu Fatululik, munisípiu Covalima seidauk asesu mak xefe aldeia Holba, Raimundo Henrique husu ba veteranu sira iha postu Fatululik labele haterus povu.
Xefe aldeia afirma lia hira ne’e, tanba deskonfia veteranu sira mak hadau malu projeitu, nune’e to’o agora populasaun liu 200-resin seidauk asesu ba liña eletrisidade.
“Ha’u reprezentante komunidade sente triste tebes, tanba tinan barak ona mak ami nafatin hanesan ne’e no la’ós ami aldeia Holba mesak, maibé iha suku Taroman aldeia tolu hanesan Holba, Fatuloro no Macous,” dehan xefe Aldeia Holba ne’e ba www.tempotimor.com iha nia servisu fatin, Segunda (16/08).
Autoriedade lokál ne’e afirma, husi la asesu ba liña eletrisidade ne’e difikulta mós oan estudante universitáriu sira ne’ebé molok fila ba moris fatin tanba Covid-19 mós susar asesu ba aula, tanba laiha liña eletrisidade hodi apoiu.
“Eletrisidade mak la iha, buat hotu falla tebes ba ami komunidade sira, nomós aat liu mak durante Covid-19, ami nia oan sira ne’ebé eskola iha uma de’it la asesu matéria liuhusi Online, ne’ebé difikulta tebes ba ami ne’ebé mak iha área rurál, tan de’it veteranu sira-nia hahalok hadau projetu, hamate ami povu, hodi taka dalan ba kompañia sira atu tama mai. Ne’ebé ami husu ba veteranus sira tenke tur hamutuk hodi responde ami-nia halerik ida ne’e hodi fó naroman ba ami aldeia tolu,” Haktenik nia
Iha tempu hanesan komunidade Aldeia Holba, Carlito da Cruz triste tanba durante ne’e seidauk asesu liña eletrisidade.
“Ami komunidade triste tebes tanba tinan 20-resin ona mak ami la asesu eletrisidade, ne’ebé husu veteranu sira tur hamutuk hodi rezolve, nune’e ami bele hetan naroman,” Nia informa.
Entertantu Suku Taroman Postu Administrativu Fatululik hamutuk Aldeia Lima, ne’ebé aldeia Lianain no Taroman mak asesu ona eletrisidade maibé aldeia tolu hanesan Fatuloro, Macous no Holba seidauk asesu eletrisidade. Alende ne’e iha suku Taroman totál populasaun hamutuk rihun 1.241.(*)
