Tempotimor (Covalima)-Tuir koordenadór Protesaun Sivíl ba Jestaun Dezastre Naturál Munisípiu Covalima (PSCJDN), Dinis Perreira katak, protesaun sivíl distribui sei apoiu materiál konstrusaun ba vítima dezastre naturál hamutuk uma-ka’in 16 iha Covalima.
“Durante ne’e ami atende ona tipu dezatre naturál hanesan inundasaun, anin sobu uma, ahi han uma no rai halai. Tanba ne’e ami kontinua distribui materiál konstrusaun ba vítima sira ne’ebé hetan afeita ba inundasasaun no dezastre naturál sira,” dehan koordenadór Dinis ba www.tempotimo.com, Sesta (02/07).
Nia afirma, materiál konstrusaun ne’ebé protesaun sivíl sei distribui iha loron 6 to’o 8 semana oin ba postu administrativu Zumalai, Maucatar, Tilomar, Fatumea no Fohorem.
“Vítima sira ne’e iha postu administrativu sira hanesan Zumalai iha uma-ka’in tolu, Suai vila iha uma-ka’in haat, Maucatar uma-ka’in ida, Tilomar uma-ka’in ida, Fatumea uma-ka’in ida no Fohorem uma-ka’in lima, maibé uma-ka’in 43 mak lista foin enkamiña ba nasionál hodi rejista ba segunda faze,” dehan Nia.
Entertantu tuir estimasaun ne’ebé Protesaun Sivíl Covalima deside ba vítima dezastre naturais ne’ebé kondisaun uma ladun grave sei hetan osan $150.00 no uma ne’ebé estragus totál sei hetan $,368.00. nune’e orsamentu ne’ebé sei apoiu ba vítima sira ne’e hamutuk $5.234 dolar amerikanu.(*)
