Tempotimor (Covalima)-Maske virus Covid-19 kontinua daet ba ema iha fatin-fatin, maibé moras Inspirasaun Respiratóriu Águda (ISPA) mós kontinua afeta ba komunidade sira iha Fohorem.
Tuir xefe Sentru saúde Fohorem, Aleixo Ferreira Carvalho katak, haree ba klimátika ne’ebé iha mak iha sentru saúde ne’e moras ISPA mak aas liu.
“Númeru ISPA aas, tanba impaktu husi klima, hanesan udan no hamosu malirin maka’as, depois loron manas oituan akompaña ho anin no rai rahun, entaun moras ISPA númeru aas iha ami-nia postu ne’e,” dehan nia ba www.tempotimor.com iha nia servisu fatin Fohorem, Sabadu (10/07).
Xefe sentru ne’e hatutan, iha postu saúde Fohorem moras seluk laiha maibé ISPA mak númeru aas inklui inan-isin-rua mak halo tratamentu saúde iha postu saúde ne’e.
“Moras ISPA ne’ebé mak registu iha ne’e 84, inan-isin-rua no bebe ne’ebé moris iha ne’e hamutuk 18, maibé bebe ida mak mate,” katak Nia.
Entertantu liga ba pandemia Covid-19, komunidaade iha postu administrativu Fohorem tauk ba halo tratamentu saúde no tanba tenke swapn foin bele halo tratamentu saúde.
“Ami nafatin korajem ba ita-nia komunidade sira ne’e mak tauk no asesu mai konsulta iha ne’e, tamba informasaun ne’ebé mak ladun los, ne’ebé fó sai husi média sosiál halo komunidade trauma no tauk mai konsulta iha ne’e,” informa xefe sentru ne’e.(*)
