Tempotimor ( Covalima) Tuir xefe Suku Fohorem, Fernando Ferreira komunidade suku Fohorem to’o agora seidauk asesu bee-moos ho di’ak, entaun durante ne’e komunidade konsumu de’it bee-moris ho ne’ebé pesiza la’o kilometru rua.
“nu’udar reprezentante komunidade sira sente triste tebes, tamba ha’u-nia komunidade barak mak asesu bee-moris durante tinan lima ona, agora seidauk asesu bee-moos, komunidaade aldeia Fatuk Kuak konsumu bee-matan iha mota,” dehan Xefe suku ne’e ba www.tempotimor.com iha nia knaar fatin, Ohin (12/07).
Autoriedade lokál ne’e afirma, karta hato’o bebeik ona autoridade postu no munisípiu Covalima, maibé ate agora seidauk responde.
“Karta ne’ebé ha’u hato’o ne’e sura labele oa, maibé nafatin laiha rezultadu, maibé ha’u hanesan xefe suku kontinua nafatin buka dalan para rezolve problema bee-moos no ha’u mós prepara ona karta balun atu hato’o ba Programa Nasionál ba Dezenvolvimentu Suku (PNDS) atu responde kona-ba bee-moos,” nia tenik.
Alende ne’e nia mós dehan, komunidade Fohorem la’ós difikulta de’it bee-moos, maibé estrada ne’ebé liga ba suku Fohorem seidauk di’ak.
“Kona-ba ami-nia estrada to’o ágora governu seidauk rezolve, ami autoridade lokal no postu hato’o bebeik ona ba parte relevante, maibé laiha responde ruma, tanba ne’e ami husu governu bainhira mak atu responde problema kona-ba estrada no bee-moos no seluk seluk tan,” dehan xefe suku ne’e.
Nia mós husu ba autoriedade Covalima atu rona no hatán ba preokupasaun komuniadde Fohorem nian, liu-liu liga ba infraestrutura báziku.
“Ha’u husu autoridade munisípiu Covalima atu informa mós ba governu relevante sira iha nasional, tamba tinan barak ona mak komunidade postu Fohorem difikulta ba kondisaun estrada no bee-moos,” katak Nia.
Iha fatin seluk, hanesan Motorista Julio da Costa sente triste ho kondisaun estrada ne’ebé liga ba suku Fohorem, tamba difikulta komunidade nia viajem ba kapitál Covalima.
“Ami mak lori motor ho kareta ne’e triste tebes ho kondisaun estrada ne’e, tamba kondisaun Estrada nafatin aat ba bebeik, bainhira tempu udan ne’e ami araska tebes atu halo movimentu,” hateten motorista.
Entertantu suku Fohorem, postu Administrativu Fohorem nia área médida lárgura 48 kuadradu ho totál populasaun hamutuk 1,590 ne’ebé kompostu husi xefe familia 380 no maioria moris ho vida agrikultura.(*)
