Tempotimor (Covalima)-Tuir Komandante Polísia Nasionál Timor-Leste (PNTL) Munisípiu Covalima, Superintendente Polísia António Mara de Sá katak, durante fulan jullu 2021, komunidade postu Maucatar hetan garnada ida no morteiru rua.
Nia afirma, sasan hirak ne’e komunidade mak hetan, entaun komunidade sira informa ba parte seguransa hodi asegura, tanba fó risku ba komunidade sira.
“Iha semana kotuk komunidade hetan garnada ida no Morteiru rua iha postu administrativu Maucatar, garnada ne’e komunidade sira hetan iha suku Bele-kasak no morteiru rua ne’e hetan iha suku Ogues Postu Maucatar,” dehan Komandante António ba www.tempotimor.com iha nia knaar fatin, Kinta (15/07).
Komandante PNTL Covalima husu ba komunidade atu labele besik sasan sira ne’e bainhira hetan, tanba fó perigu ba ema-nia vida.
“Husu ba komunidade sira iha Covalima karik hetan materiál hanesan ne’e, husu ita bo’ot sira informa kedas mai polísia iha suku sira, nune’e polísia toma atensaun no labele ameasa ba ema-nia Vida, no ami mós hato’o ona ba ekipa polísia espesiál nasionál, ne’ebé tempu badak sei mai harahun ekipamentus refere,” Nia subliña.(*)