EKSES20 Organiza Joven Hamos Bee Matan “Mata Air” Husi Lixu

Juventude sira hamos hela lixu sira ne'ebe hafutar bee-matan Mata Air, iha suku Debos. Kinta (15/07). Foto Tempo Timor

Tempotimor (Covalima)-Haree ba komunidae sira ne’ebé soe lixu arbiru iha bee-matan “Mata Air”, mak ekipa média husi Rádiu Komunidade Cova Taroman (RKCT) hamutuk ho ekipa EKSES20 no Forsa Humanista Covalima (FHC) halo limpeza ba lizu ne’ebé komunidade sira soe arbiru iha bee-matan.

Tuir Koordenadór EKSES20, Martino Gusmão Alves Lelo katak, nu’udar Covalimaoan tenke kontribui ba ambiente mós, nune’e ohin ekipa mai hamos bee-matan Mata Air ne’ebé nakonu ho lixu.

Read More

“Ita haree katak ambiente iha bee-matan ne’e  la furak, nakonu ho plastiku ho aqua mamuk, tanba ne’e konvida kolega EKSES20 sira no média www.tempotimor.com rasik nomós kolega sira rádiu komunidade Cova Taroman no Covalima Tactikal Team, Forsa Humanista Covalima (FHC) mai hamos fatin ne’e, tanba tempu uluk ema bolu Suai Bersenih, maibé agora nakonu ho plástiku sira, tanba ne’e mak ami mai hamos,” dehna Koordenadér Martino ba www.tempotimor.com iha Bee-matan Mata Air, suku Debos, Kinta (15/07).

Nia husu ba komunidade sira ne’ebé kuru bee iha bee-matan Mata Air, atu kuidadu no labele soe lixu arbiru, tanba em abarak mak sei asesu ba bee refere.

“Husu ba komunidade sira iha suku Debos aldeia rua ka tolu ida mak asesu ba Bee-matan ne’e labele soe arbiru plástiku no aqua mamuk no foer seluk-seluk iha fatin públiku hanesan ne’e, tanba ne’e fatin sagradu, se ita na’in la respeitu hodi soe foer arbiru iha ne’e, entaun se mak mai atu hamos? ita sira ne’e mak mai hamos, ne’ebé husu ba inan-aman sira tenke uza bee-matan ne’e ho konsiénsia,” hateten nia

Entertantu xefe suku Debos, Agustino da Silva Agradese ba asaun joven EKSES20 no média sira-nia kontribuisaun hodi ajuda ona Komunidade sira hamos bee-matan ne’e husi lixu.

“Agradese ba joven sira, tanba sira iha inisativa rasik hodi mai hamos bee-matan ne’e, tanba ita haree foer loos, maibé agora moos fali ona. Ne’ebé husu komunidade sira tenke uza fatin ne’e ho kuidadu, tau lixu iha nia fatin,” katak nia.

Entretantu bee-matan Mata Air ne’e lokaliza iha suku Debos, postu administrativu Suai, Munisípiu Covalima(*)

Related posts