Tempotimor (Covalima)-Nu’udar ema moris iha mundu, Maromak fó talentu oioin ba ema hotu hodi uza iha moris loron-loron, hanesan mós joven Marcelino Afonso (28) ne’ebé naran koñesidu ho “Oby” uza nia talentu badaen uma hodi luta ba moris familia nian.
Marcelino Afonso husi suku Taroman, postu administrativu FatuLulik, munisípiu Covalima, ne’ebé moris iha loron 03 Maiu 1993, oan doben husi Martinho Da Cruz no Saturina Sequeira ne’ebé Oby nu’udar maun boot ba alin na’in tolu iha uma laran.
Joven Marcelino Afonso hahú nia estudu iha eskola primária Taroman iha 2001 no remata iha 2006, hafoin remata nia estudu ne’e, Marcelino kontinua estudu iha nível pre-sekundária iha Loktoi Taroman no 2008 no remata iha 2010. Enkuantu Marcelino remata nia eatudu iha nível pre-sekundária, nia mós deside kontinua estudu iha nível sekundária iha Eskola Sekundaria Jerál Públika Nutetuk Fohorem iha tinan 2011 no remata iha 2013.
Iha tinan 2013, bainhira Marçelino remata nia estudu iha nível sekundária iha hakarak tebes atu kontinua estudu iha Universidade, maibé mehi sira ne’e labele realiza tanba ekonomikamenta familia nian kiik tebes.
Husi tempu ne’ebé la’o, halo Marcelino nia fuan rahun bainhira haree kolega sira tuur iha banku universidade ho kontente, maibé atu la’o tan oinsa, ekonomia familia la hanesan ho ema sleuk.
Maske nune’e, Marcelino la lakon vontade hodi luta hasoru moris nia sirkunstánia. Nune’e, situasaun sira ne’e orienta Oby fila ba nia mehi ida uluk ne’ebé hakarak sai badaen uma no pintór.
“Ha’u fila fali ba ha’u-nia mehi ida uluk ne’ebé hakarak sai badaen uma nian no pintór ka arte, tanba sei ki’ik kedas hakarak sai pintór inklui badaen uma nian,” dehan Marçelino ba www.tempotimor.com hafoin dada-lia ho nia iha nia rezidénsia, Ohin (16/07).
Joven mane ne’e konta, bainhira fila ba mehi ida uluk, konsege sustenta moris familia nian to’o ohin loron.
“To’o agora, ha’u-nia servisu mak halo uma, pinta edifísiu inklui uma privadu sira, kuandu ema presiza, maibé atu dehan katak, edifísiu barak iha postu Fatululik mak ha’u pinta ona inklui Logo PNTL Postu Fatululik nomós eskola sira iha Postu ne’e,” nia konta.
Oby ne’ebé ho idade 28 ne’e dehan, atu sai badaen no pintór la presiza tuir kursu, maibé uza de’it talentu ne’ebé iha, konserteza sei sai furak tuir ema barak nia haree.
“Hau la tuir kursu ruma kona-ba desing ka badaen nian, maibé ha’u mak gosta halo hanesan ne’e, tanba liuhusi buat sira ne’e mós ita bele hetan osan hodi sustenta família uma laran, hanesan alin sira no ha’u-nia mama,” Oby konta ho hamnasa.
Oby dehan, bainhira ema presiza nia atu pinta uma, nia bele hetan rendimentu husi dollar amerikanu $50.00 ba leten, tanba dalaruma fasilidade sira ba pinta uma, uma na’in sira mak prepara.
Maske mehi sai badaen ema barak lakohi, tanba sai ema ne’ebé foer, maibé ba Marcelino ida ne’e hanesan osan mean, tanba hatutan familia nia moris iha sosiedade nia leet.
Tanba ne’e, husi kondisaun real ne’e, Oby haksasin lian ba parte relevante sira atu tulun no fasilita nia hodi dezenvolve liután talentu ne’ebé nia iha.
“Karik bele governu ajuda ha’u kona-ba fatin hodi halo ha’u-nia servisu no fasilidade kona-ba pintura nian,” Oby husu ho lian neiniek.(*)
