Tempotimor (Covalima)-Asosiasaun Rádiu Komunidade Timor-Leste (ARKTL) atribui sertifikadu apresiasaun ba estudante na’in 10 husi Eskola Sekundária Jerál Públika (ESJP) Suai, hafoin kompleta fulan tolu hetan formasaun husi Rádiu Komunidade Cova Taroman (RCCT) kona-ba jornalizmu báziku no radiudifuzaun.
Tuir Prezidente ARKTL, Prezado Ximenes katak, apresia ba kooperasaun Rádiu Komunidade Cova Taroman no Eskola Sekundária Jerál Públika (ESJP) Suai, hodi kapasita estudante sira iha mundu jornalizmu.
“Ha’u kontenti rona katak, RCCT iha kooperasaun di’ak ho ESJP nú. 1 Suai. Ne’ebé ba ha’u, ida ne’e potensiál boot ida atu suporta, tanba ita komesa kuda no fahe ona matenek ba estudante sira no oinsá jornalista bele buras iha Covalima, tanba ha’u iha mehi ida katak, mada tinan ida anualmente halo formasaum nafatin ida hanesan ne’e,” katak Prezidente ARKTL Iha Salaun ESGP, Kinta (23/09).
Iha Sorin Seluk Diretór ESJP Suai, Francelino Freitas apresia Rádiu Komunidade Cova Taroman no Asosiasaun Rádiu Komunidade Timor-Leste (ARKTL) tanba durante ne’e website eskola ladun funsiona ho di’ak, maibé garante katak estudante na’in 10 ne’e bele halo mudansa Website eskola nian.
“Durante ne’e ami iha website eskola nian, maibé ladun funsiona ho di’ak, tanba ne’e entre eskola ho RCCT liuhusi ARKTL hodi fó formasaun ba estudante, ne’ebé ha’u garante katak, ba oin média eskola la’o di’ak ona, tanba durante laiha rekursu entaun média eskola nian falla hela de’it,” nia tenik.
Alende ne’e reprezentante estudante ESJP Suai, Januário Amaral orgullu no apresia ba RCCT durante fulan tolu, hodi fasilita estudante sira oinsa mak atu aprende kona- a lalaok jornalista ho di’ak.
“Reprezenta kolega na’in 10, ami sente kontente no orgullu tebes ba Jestór RCCT ho ekipa, tanba durante ne’e hanorin ami oinsa bele ba kobertura no edit notísia no prepara aan hodi ko’alia iha rádiu nomós programa PSA sira no seluk seluk tan,” katak nia,” nia dehan.(*)
