Tempotimor (Covalima)-Liga ba pandemia Covid-19 ne’ebé afeta ba mundu inklui Timor-Leste, mak desportu ho modalidade Taekwondo suspende atividade treinamentu, provizóriu, maibé ohin Taekwondo munisípiu Covalima reativa hikas treinamentu ba membru sira.
Treinadór Taekwondo Munisípiu Covalima, Mariano Lopes hateten, tanba pandemia Covid-19 mak atividade trenu ba labarik sira paradu. Entaun agora Covalima livre ona husi Covid-19 maka atividade funsiona normal.
“Ohin ita reativa fali treinu ba labaraik sira, tanba kleur ona suspende, depois treinamentu ba ita-nia alin no oan sira ne’e la’ós hanorin negativu, entaun hahú fali trenu, tanba fulan oin mai atu tuir ezame,” dehan Treinadór Mariano iha kampu Sándalo, Suku Debos, Sábadu (17/07).
Nia afirma, planu ba oin sei loke atividade trenu ba postu hitu ne’ebé hola parte ba munisípiu Covalima.
“Ami-nia planu ba oin sei loke iha postu sira iha munisípiu Covalima atu promove labarik sira-nia talentu liuhusi Taekwondo ba iha nível nasionál no internasionál,” katak Nia.
Entertantu estudante Taekwondo iha munisipiu Covalima hamutuk 140 ne’ebé kompostu husi mane 70- resin no feto 30-resin. Depois treinamentu ba estudante sira ne’e semana ida dala tolu mak hala’o iha loron Segunda, Sábadu no Domingu lokraik.(*)
