Tempotimor (Covalima)-Tuir Diretór Servisu Saúde Munisípiu Covalima (SSMC), Filipe Perreira Lemos katak, tinan barak ona mak postu administrativu Fatululik no Maucatar laiha ambulánsia hodi transporta moras ruma mai Ospitál Referál Suai, tanba avaria totál.
“Tempu naruk ona mak postu Fatululik no Maucatar laiha ambulánsia hodi tula pasiente sira, tanba aat hotu ona, entaun agora para hela iha ne’e, maibé bainhira husi postu rua ne’e komunidade sira moras husi munisípiu ajuda ba tula mai iha Óspital Referal Suai,” hateten Diretór Filipe ba www.tempotimor.com iha nia knaar fatin, Sesta (16/07).
lha sorin xefe Sentru Saúde postu administrativu FatuLulik, Jose da Cruz preokupa tebes, tanba kareta ambulánsia ne’ebé atu tula moras grave ba munisípiu laiha.
“Bainhira ema ruma moras iha postu Fatululik ne’e, ami komunika ba munisípiu, maibé ita-nia dalan ladi’ak no kareta ambulánsia postu mós laiha entaun ambulánsia husi munisípiu mak mai ne’e susar tebes, maibé sempre buka meius para transfere pasiente ba munisípiu hodi salva nia vida,” hateten nia
Ba problema ne’e nia husu ba governu liu-liu Ministériu Saúde atu tau atensaun lalais, tanba atu salva ema-nia vida presiza iha transporte nune’e iha moras grave trasporta lalais ba fasilidade saúde ne’ebé bele garante ba ema-nia vida.(*)
