Tempotimor (Covalima)-Veteranu Arnaldo da Silva “Maukiak Lemorai” husi Postu Zumalai ne’ebé hetan torturasaun husi Militar Indonézia durante tinan haat nia laran, maibé ohin hakotu ona iss inklui la hetan direitu to’o ohin loron.
Iha situasaun tristeza ne’e, reprezentante familia Abrão Nascimento nu’udar veteranu ida husi suku Lour husu ba giovernu liu-liu ministériu relevante atu tau matan ba oan ki’ak no faluk ne’ebé sei moris.
“Ami-nia avó, ami-nia aman hetan moras komplikadu hodi nune’e horseik husik hela oan ki’ak ho nia fen, ne’ebé ohin atu halo’ot ona, maibé ami husu ba governu tenke tau matan ba nia oan no fen, tanba iha postu Zumalai matebian ne’e mós ema koñesidu ida, tanba hetan torturasaun depois hatama iha kadeia iha Atauro, Betano, Ainaro durante tinan haat no sai husi kadeia kontinua hala’o klandestina maibé to’o agora seidauk hetan nia direitu, nia kolega seluk hetan hotu ona maibé nia mak seidauk to’o nia mate, tanba ne’e husu ba ministériu relevante sira tenke haree no tau matan más ba nia, saida mak nia halo iha momentu ne’ebá,” Hateten Abrão ba www.tempotimor.com iha hafoin atu halo’ot matebian nia mate isin, Domingu (29/08).
Molok halo’ot mate isin, porta-voz Adolfo da Silva lee sai matebian Arnaldo da Silva “Malikati” (Maukia Lemorai) nia biografia durante defende Timor-Leste hodi hasoru militár no inimigu sira husi Indonézia.
Biográfia Veteranu Arnaldo da Silva “Maukiak Lemorai”
Arnaldo da Silva Malikati (Maukiak Lemorai) moris iha Lour Laegatal iha loron 1 Janeiru iha tinan 1939, oan husi Bere Taí no Abu Leto, ne’ebé Malikati hamutuk maun-alin na’in lima ne’ebé iha feto na’in tolu no mane na’in rua.
Arnaldo da Silva Malikati hahú nia eskola Primária iha 1951 to’o 1952 iha Mape Zumalai tempu okupasaun Portugés, maibé la konsege remata ninia estudu, Tanba iha tinan 1953 nia inklina an ona tropas militar durante tinan tolu, depois sai mós membru Sipai iha Postu Zumalai iha tinan 1961-1972 depois muda fali ba postu Fatululik no Fatumea durante tinan 11.
Iha tinan 1975 hamutuk ho seksaun ida iha Postu Zumalai suku Raimea hodi kontra invasaun Militar Indonézia, ne’ebé iha altura ne’ebá Saudozu Maukiak Lemorai ho nia maluk sira hasoru invasaun Indonézia iha Aileu Laulara, iha ne’ebé asumi kargu hanesan segundu Komandante Pletaun.
Iha tinan 1981 Saudozu hetan kapturasaun husi Militar Indonézia, Tanba deskonfia intelijen ka apoiu FALINTIL, nune’e militár sira hodi hatama saudozu ba prizaun Ainaro durante fulan rua. Iha tempu mós saudozu muda fali ba prizaun Dili durante fulan rua, no kontinua Militar Indonézia muda fali saudozu ba Prizaun Atauro sai hanesan desteradu durante tinan haat nia laran, depois iha tinan 1985 fila husi Illa Atauro.
Iha 1987 Militar Indonézia muda Saudozu mai iha prizaun Betanu hodi kontinua kastigu hanesan desteradu durante fulan rua, Depois Militar Indonézia retira fali saudozu ba prizaun Ainaro hodi investiga saudozu ne’ebé sofre kuaze tinan barak nia laran iha prizaun hodi hetan liberdade.
Depois de hetan liberdade husi Militar Indonézia Saudozu mós iha esprítu nasionalizmu ho aten brani kontinua involve aan iha liña klandestina hamutuk ho grupu ne’ebé ho naran Foho Hun Nagidal postu Zumalai, maibé iha tinan 1992 hetan tan torturasaun husi grupu ne’ebé apoiu Militar Indonézia ho naran Sukarelawan husi munisípiu Ainaro Kasa.
Aleinde ne’e Saudozu mos kontinua ninia luta hodi hetan independénsia ba rai doben Timor-Leste no ikus liu iha 28 fulan Agostu iha tinan 2021 saudozu hakotu ninia pregrinasaun iha mundu. Enquantu veteranu Maukiak Lemorai familia sira haloot ona iha semitériu sub aldeia Nagidal Aldeia Laegatal, suku Lour, postu administrativu Zumalai, Munisípiu Covalima.(*)
