Tempotimor (Covalima)-Maske servisu bombeirus nian risku tebes, maibé haree ba kondisaun bombeirus Covalima nian triste tebes, tanba ekipamentu hotu ne’ebé iha la merese atu uza.
Tuir reprezentante Embaixadór Japaun iha Timor-Leste, Koordenadór Projetu Fundu Asisténsia Seguransa Umana Timor-Leste, Akuing Soares Lay triste tebes haree kondisaun kareta bombeirus no fasilidade sira iha munisípiu Covalima.
“Ha’u triste tebes ho fasiliade sira ne’ebé ita-nia funsionáriu bombeirus munisípiu Covalima uza hanesan edifísiu, kondisaun kareta rua nomós materiál ne’ebé atu hasoru dezastre naturais hanesan ahi han uma no seluk tan ne’e la merese uza tanba inpaktu no risku boot ba sira nia vida, tanba sasan sira ne’e la seguru ba sira bainhira hasoru dezastre,” dehan nia ba www.tempotimor.com hafoin vizita edifísiu bombeirus Covalima, Ohin (23/07).
Ba kondisaun ne’e, nia promete sei informa ba governu Japaun hodi responde preokupasaun bombeirus sira nian.
“Dala ita tan ha’u triste tebes ha’u rona sira-nia preokupasaun no haree sira-nia konsidaun, ne’ebé ha’u fila husi Covalima hato’o kedas ba governu Japaun, tanba governu Japaun hakarak apoiu nasaun ki’ik hanesan Timor-Leste no nia lakohi nasaun ki’ik sira iha kotuk, maibé tenke iha oin ka hanesan ho nasaun sira seluk, depois ohin ha’u haree direta fasilidade sira hanesan mákina sira iha ne’e, iha ema-nia rai hodi rega du’ut, maibé ita uza hodi ba salva ema-nia vida,” haktenik nia.
Iha fatin hanesan Komandante bombeirus Munisípiu Covalima, Benjamin Amaral kontenti ho delegasaun embaixada Japaun ne’ebé konsege vizita ona eskuadra bombeirus sira iha Covalima hodi hatene preokupasaun sira.
“Kontenti tebes tanba delegasaun embaixada Japaun ne’ebé mai direta haree kondisaun eskuadra Bombeirus Covalima nian, Tamba sira bele hatene saida mak ami hasoru iha terrenu relasiona ho situasaun polítika ida,” katak nia.
Nia mós dehan, edifísiu ne’ebé bombeirus Covalima utiliza la’ós edifísiu bombeirus nian, maibé Renetil nian.
“Ami-nia edifísiu ne’e laos permanente ami uza Renetil nia fatin ne’ebé ami uza temporáriu, kona-ba edifísiu ne’e tinan-tinan ha’u hato’o bebeik iha munisípiu sempre pasa, maibé grande projetu ne’ebé iha nasionál la pasa, entaun labele halo, maske rai iha ona, maibé hein de’it bainhira mak halo,” nia tenik.
Nia mós dehan, liga kondisaun ne’e sempre hato’o relatóriu ba nasionál maibé laiha resposta to’o agora.
Entertantu funsionáriu bombeiros iha munisípiu Covalima hamutuk na’in 17 mak kobre Munisípiu Covalima no iha karreta 4 maibé ida aat ona hela tolu mak kontinua halo movimentasaun kuandu iha dezastre naturais.(*)
