Tempotimor (Covalima)-Haree ba infraestrutura báziku hanesan estrada, eletrisidade ne’ebé tempu barak nia laran difikulta tebes ba komunidade Holba, maka xefe aldeia Holba, Raimundo Henrique husu ba Institutu Jestaun ba Ekipamentus (IJE) atu hadi’a estrada ne’ebé ligasaun entre Holba ho Fatululik.
Xefe aldeia ne’e afirma, estrada husi Postu Fohorem, Suku Dato-tolu IJE dudu ona, Maibé suku Taroman aldeia Holba kontinua iha tahu-laran hodi difikulta movimentu transportes nian.
“Ha’u hakarak husu ba IJE de’it, tanba saida mak sira dudu estrada parte suku Dato-tolu dudu ho di’ak, maibé parte aldeia Holba diresaun ba postu administrativu Fatululik no ba merkadu Suai difikulta tebes, tanba nakonu ho tahu tempu udan, sira la halo bee-dalan, estrda hanesan mota tempu udan,” dehan Raimundo ba jornalista www.tempotimor.com iha aldeia Holba, Segunda (16/08).
Xefe aldeia ne’e kontinua alerta ba estadu no kompañia katak presiza hadi’a fali estrada husi aldeia Holba ba postu administrativu Fatululik.
“Ha’u rekomenda ba estadu, liu-liu ba IJE se bele dudu fila fali hodi halo bee-dalan nune’e tempu udan ami bele halo movimentu ho di’ak, tanba agora udan ami labele halo movimentu ho transporte tanba tahu, tanba ne’e husu ba IJE se bele hadia fila fali nune’e labele difikulta ba ami,” hateten Nia.(*)
