Tempotimor (Covalima)-Tuir Prezidente Rotaract Club Covalima (ROCCOV), Julio Arlindo katak, atu komemora aniversáriu loron Falintil ba dala-46, ROCCOV kontinua apoiu aihan bázika ba famiia kbi’it laek no defisiénsia hamutuk uma-ka’in 17 iha Aitos.
“Ohin loron ami ROCCOV selebra loron Falintil 20 de Agostu ba dala-46 nian ami halo aktividade distribuísaun aihan sesta bázika ba familia kbi’it laek sira hanesan faluk no defisiénte sira iha aldeia Aitos, Suku Dato-rua, postu administrativu Fohorem, munisípiu Covalima,” dehan Prezidente ROCCOV, Julio ba www.tempotimor.com, Kinta (19/08).
Nia afirma, distribuisaun aihan bázika ne’e sei kontinua ba komunidade sira iha área rural ne’ebé seidauk hetan ajuda husi Rotarac Covalima.
“Ita sei kontinua ba área rural sira iha munisípiu Covalima ne’ebé seidauk hetan, ne’ebé ekipa voluntáriu ROCCOV kontinua identifika kbi’it laek no maluk defisiénte sira ne’ebé hela iha área rural,” nia tenik.
Iha tempu hanesan benefisiáriu Matilda Ferreira Bui (68) agradese ba ekipa Rotaract Covalima, tanba ho fahe aihan ba kbi’it laek sira.
“Ami sente kontenti tebes ho oan sira-nia domin bele mai to’o ami ne’ebé mak hela iha área rural, maske sasan la barak maibé ami hodi sustenta uma laran durante semana ida ho rua nia laran, ne’ebé ami kontenti tebes no agradese ba oan sira ne’ebé mak fahe ona sasan ba ami,” nia tenik.
Entertantu benefisiáriu husi aldeia Aitos hamutuk hamutuk uma-ka’in 17, nune’e husi inísiu to’o ohin, Rotaract Covalima apoiu ona aihan báziku ba familia vulnerável sira hamutuk uma-ka’in 79.(*)
