Tempotimor (Covalima) Organizasaun Noun Govermental (ONG) ba Futuru, fó treinamentu ba negosiante na’in 25 husi postu Administrativu Suai, munisípiu Covalima.
Tuir Staff ONG Ba Futuru Octavianty Maria Nunes katak, objetivu husi treinamentu ne’e atu hasa’e abilidade negosiante sira-nian hodi partisipa ho di’ak iha atividades ekonómia, no oinsa bele rezolve konflitu la uza violénsia no koñesimentu kona-ba prevensaun violénsia bazeia ba jéneru.
“Objetivu husi treinamentu ida ne’e, atu haforsa feto sira iha área negósiu nian, oinsa bele jere osan, rai osan, no impresta osan, depois oinsa sira bele rezolve konflitu la uza violénsia no hasa’e koñesimentu kona-ba oinsa bele halo prevensaun violénsia bazeia ba jéneru,” dehan Octavianty ba www.tempotimor.com iha sede Suku Debos, Tersa (24/08).
Nia afirma, formasaun ba negosiante feto sira ne’e sei hala’o durante semana ida resin ne’ebé hahú ona segunda-feira horiseik (23/08/2021) no sei finaliza iha loron 2 Setembru.
“Ami-nia ONG Ba Futuru identifika katak Postu Suai maka negosiante barak liu, aleinde ida ne’e suku Maudemo, ne’ebé dadaun ne’e ami foka de’it maka postu Suai depois maka pasa ba fatin seluk,” nia dehan.
Iha fatin hanesan, partisipante Lidia Ikun Soares husi Aldeia Asurai sente kontente ho formasaun ne’e, tamba bele hasa’e sira-nia koñesimentu kona-ba negósiu no no seluk tan.
“Ha’u sente kontente tebes ho formasaun ida ne’e, tamba bele hasa’e ona ami-nia koñesimentu kona-ba lala’ok negósiu nian, depois kona-ba konflitu no selutreinamentu ne’e hotu, buat ne’ebé ha’u iha bele aplika iha ha’u-nia komunidade nia le’et,” Lidia dehan.
Entertantu partisipantes na’in 25 ne’ebé tuir treinamentu ne’e mai husi munisípiu Covalima, postu Suai, ne’ebé kompostu husi suku Suai-Loro, Debos, Kamanasa no NGO ba Futuru hetan finánsia husi MISEREOR husi Nasaun Jerman no Ko-finánsia husi Kinder Mission.(*)
