Tempotimor (Covalima)-Tuir xefe suku Beco, Arlindo Bernadino Lemos katak, iha Postu Suai, suku Beco iha aldeia tolu mak durante ne’e seidauk asesu rede telekomunikasaun ho di’ak.
“Iha suku Beco, aldeia tolu hanesan Gala, Tobur no Teda mak durante ne’e asesu ba rede telekomunikasaun seidauk efetivu, tanba bainhira atu halo komunikasaun ita bele dehan rede laiha, tanba derepente mosu, derepente lakon depois dere ne’e tuir anin de’it,” Hateten xefe suku Beco, Arlindo ba www.tempotimor.com liuhusi via telefone, Tersa (24/08).
Iha sorin seluk xefe Aldeia Gala, Suku Beco, Armando Barreto mos informa katak, Aldeia Gala difisil atu halo Komunikasaun liuhusi via telefone, bainhira presiza ruma.
“Ami nian ne’e kona-ba rede telefene ne’e araska liu, Telemor mós lakon mosu, Timor Telecom no Telkomcel laiha liu, bainhira ita atu halo komunikasaun ho sira iha suku ka postu ne’e araska, ita tenke la’o ain ba to’o sede suku mak hato’o kona-ba komunidade sira-nia preokupasaun sira ne’e, ohin ita boot sira telefone ami ne’e mós ami tun mai villa mak telefone tama ne’e, lae ami fila ba ami nia knua ne’e telefone rai lerek,” Hateten Nia
Entertantu komunidade aldeia tolu ne’e hamutuk 900 ne’ebé hela iha área rurais tebes, no aldeia tolu ne’e mós ejize ba governu atu instala Elektrisidade no husu ba kompañia Telemor, Timor Telecom no Telkomcel atu harii antena ida hodi Nune’e sira bele asesu rede telefóne.(*)
