Tempotimor (Covalima)-Kinta-feira (16/09/2021) ne’e Sekretáriu Estadu ba Igualidade no Inkluzaun (SEII) liuhusi Departamentu Formasaun no Partisipasaun Polítika (DFPP) hakbi’it feto no hasa’e koñesimentu feto ho potensialidade iha munisípiu Covalima hodi prepra aan, nune’e bele kompete iha eleisaun suku ne’ebe sei akontese tinan oin.
Iha formasaun ne’e, Xefe Departamentu Formasaun Partisipasaun Politika, José do R. de Carvalho katak, governu no estadu kada tinan sempre hala’o eleisaun, tanba ne’e SEII atu kapasita feto sira, hodi bele kompete iha eleisaun suku sira tuir mai.
“Ita kontinua habelar informasaun ba maluk feto sira, tanba SEII nia papél nafatin kapasita liuhusi formasaun hodi hakbi’it feto sira iha territóriu Timor-Leste tomak inklui feto kbi’it laek sira iha Covalima rasik, Nune’e tinan oin mai bele kompete ho mane sira iha eleisaun ba xefe suku nomós sektorais sira hotu ne’ebé sira hola kna’ar ba iha institusaun ida-idak,” dehan xefe departamentu ne’e liuhusi diskursu hodi halo abertura ba formasaun ne’ebé hala’o iha sede suku Debos, postu Suai, munisípiu Covalima, Kinta (16/09).
Iha fatin hanesan Administradór Munisípiu Covalima (AMC), Fransisco de Andrade husu ba feto potensial sira iha munisípiu Covalima atu prepara aan hodi compete ho mane sira, tanba feto iha Covalima barak, maibé oituan de’it mak asesu kampu servisu.
“Tanba ne’e besik ona eleisaun suku, husu ba ita-boot sira atu kompete xefe suku ka sai diretor, labele tauk mane sira, tanba feto mós iha direitu hanesan ho mane sira, atu nafatin firmi pozisaun kada eleisaun tenke partisipa máximu, iha eleisaun ka kualker atividade sira hotu, tanba ita feto Covalima menus kompete servisu munisípiu no nasionál,” Hateten administrador Francisco.
Entertantu formasaun ne’e hetan partisipante máximu husi feto potensial sira iha munisípiu Covalima, hodi Prepra ba kompete ba eleisaun suku ne’ebé sei akontese iha tinan tuir mai.(*)
