Tempotimor (Covalima)-Administradór Munisípiu Covalima (AMC), Francisco de Andrade husu ba feto Covalimaoan atu albele tauk hodi kompete ho mane hodi kandidata aan ba lideransa ka iha área polítika maske nível edukasaun lahanesan.
“Atu sai Lideransa labele tauk atu kompete iha eleisaun suku ka diretór sira no kualker instituisaun iha munisípiu Covalima no Nasional, depois labele haree ba edukasaun mínimu, tanba iha Timor-Leste sai lideransa balu mós nível edukasaun mínimu, tanba ne’e ha’u husu imi feto sira labele uza sentimentu no lakon tempu, tanba iha munisípiu Covalima ha’u hare feto menus liu sai lideransa ka sai funsionáriu, maioria mane de’it,” dehan Administradór Francisco ba média sira iha sede suku Debos, Suai, Kinta (16/09).
Administradór ne’e mós enkoraza feto potensiál sira atu partisipa ativa ihaatividade sira refere, hodi nune’e aumenta koñesimentu no mentalidade hodi prepara aan ba futuru, bainhira mosu eleisaun ba suku no partisipa iha vida polítika.
“Ha’u husu maluk feto sira labele sibuk mak dapur nian, fase roupa no haree labarik, tenke prepara aan hodi kompete iha eleisaun tuir mai, tamba imi-nia direitu hanesan ho ami mane, tanba ne’e presiza asuntu relasiona ho servisu bele hakaat ba edifísiu administrasaun munisípiu Covalima,” Nia dehan.
Iha fatin hanesan Prezidente Feto Potensiál Munisípiu Covalima, Cariana Elsa Barreto promete sei kompete iha eleisaun suku ho númeru feto ne’ebé aas iha munisípiu Covalima.
“Ami sei enkoraza maluk feto sira nune’e tinan oin mai bele kandidata aan ba xefe suku sira nomós rekomenda ba ministériu relevante tenke tau atensaun ba maluk feto sira, nune’e feto mós barak mak hola parte,” hateten nia
Entertantu formasaun ne’ebé hala’o husi Sekretáriu Estadu ba Igualidade no Inkluzaun (SEII) liuhusi Departamentu Formasaun no Partisipasaun Polítika (DFPP) foka liu ba oinsá feto sai Lideransa iha suku ka instituisaun inklui komportamentu no disiplilina iha jestaun finanseiru.(*)
