Tempotimor (Covalima)-Komunidade uma-ka’in 62 ne’ebé afetadu ba projeitu konstrusaun Aeroportu Kayrala Xanana Gusmão Suai, ejize ba governu atu realokasaun ba sira, tanba durante tinan lima ona komunidade afetadu aldeia Holbelis, suku Labarai, postu Suai governu seidauk tau matan.
Tuir xefe suku Labarai, Mouzinho Amaral katak, iha suku balun governu halo ona realokasaun ba komunidade afetadu sira, maibé iha suku Labarai, aldeia Holbelis governu seidauk foti desizaun ruma.
“Husi tinan 2015 hahú konstrusaun uma ba komunidade afetadu no konsege finaliza ona iha suku Matai, aldeia Lohorai, maibé iha ha’u nia suku ne’e rasik governu seidauk foti desizaun ruma, tanba ne’e ha’u-nia komunidade sira atu halo uma di’ak mós labele, tanba governu atu foti sira ba iha bairo seluk, entaun ami-nia komunidade sira ejize ida ne’e,” dehan xefe suku Labarai, hafoin partisipa iha inagurasaun semitériu Holbelis, Kinta (23/09).
Autoriedade lokál ne’e hanoin mak buat hotu rezolvidu ona, tanba komunidade ho Timor Gap halo ona enkontru iha salaun Administrasaun Munisípiu, molok tama tinan 2021 iha publikasaun husi média sosiál katak, iha ona kompañia balun maka atu konstroi uma sira, maibé tina 2021 besik remata ona maibé Timor Gap no governu lian laiha.
Hatán ba preokupasaun ne’e, Ministru Petróleu no Minerais (MPM), Victor da Conceição Soares katak, tuir lolook konstrusaun ne’e hahú ona, maibé tanba kompañia ne’ebé involve iha prosesu ne’e barak mak hato’o keixa ba MPM, entaun impede ba prosesu refere.
“Dezde ha’u hala’o knaar ha’u simu keixa barak husi emprezáriu sira ne’ebé envolve iha konkursu atu halo konstrusaun ne’e, prosesu ne’ebé durante ne’e halo, Timor Gap anteriór la halo konkursu públiku no la halo transparente to’o sira ameasa malu atu lori ba tribunal, tanba ne’e maka impede, to’o ohin loron seidauk halo,” Governante ne’e dehan.
Governante ne’e mós dehan, prosesu refere hahú faze foun, tanba ne’e nia promete iha tempu badak sei halo konstrusaun uma ba familia afetadu hamutuk uma-ka’in 62 iha aldeia Holbelis, suku Labarai, postu Suai, munisípiu Covalima.(*)