Tempotimor (Covalima)-Relasiona ho informasaun ne’ebé fó sai ona husi metereolójia katak fulan oin sei akontese fenomena laniña (udan-boot), maka mota Tafara sei fó amesa maka’as ba vida komunidade rihun 2.331 ne’ebé lokaliza iha área refere.
Ba kestaun ne’e, tanba ne’e Diretór Servisu Munisipial Seguransa no Alimentar (DSMSA), Reinaldo Moniz Coli, husu ba komunidade sira tenke halo’ot didi’ak aihan ne’ebé iha, no hamenus frekuénsia gastus ba aihan, atu nune’e bainhira fenomena laniña akontese, labele hamosu inseguransa ba aihan.
“Ita ko’alia kona-ba seguransa alimentar entaun iha uma-ka’in ida-idak tenke iha aihan ne’ebé naton, entaun agora dadaun ita tenke antisipa, halot aihan halo didi’ak no hamenus volume gastus ba aihan ne’e, tanba kalamidade ne’e bainhira mosu hodi estraga aihan iha uma laran ne’ebé iha, entaun hamosu ona inseguransa aihan, bele aumenta mós númeru má-nutrisaun, tanba ne’e ha’u husu ba komunidade sira tenke kuidadu no halot didi’ak aihan, tanba fenomena laniña mosu ita la espera,” dehan Reinaldo hafoin sosializa informasaun sira ne’e ba komunidade Cassabauk, Tersa (28/09).
Reinaldo husu ba komunidade sira atu labele hela besik iha mota no tasi, maibé hela ho distánsia dook husi husi tasi no mota maizumenus metru limanulu.
“Komunidade sira labele hela besik iha tasi no mota sira, tenke dok husi tasi ho mota ne’e metru limanulu (50) hodi nune’e ita fasíl atu prevene aan bainhira fenómena laniña ne’e mosu,” nia hatete.
Iha fatin hanesan, xefe Suku Cassabauk, Inácio Amaral Gusmão mós rekoñese katak, bainhira akontese laniña bele afeta ba suku Cassabauk, tanba besik mota Tafara.
“Se laniña ne’e akontese duni, ha’u nia komunidade sira iha suku Cassabauk rihun rua resin, ameasa tebes ba sira nia vida, uma no animal sira, to’os hotu sei la salva, tanba tinan-tinan tempu udan ne’e sempre amesa ba sira-nia vida moris, hodi estragus sira-nia animal no to’os,” dehan xefe suku ne’e.
Alende ne’e, komunidade Bendito do Rego Gomes husi aldeia Tabolo katak, kada tinan komunidade Cassabauk sempre sai vítima, maibé laiha parte relevante laiha ida mak ajuda komunidad sira.
“Ami tinan tinan sempre hetan amesa husi korente mota boot hodi estraga ami-nia to’os no animal hanesan karau, fahi, manu nomós uma sira, maibé la hetan ajuda ruma husi parte relevante sira iha postu administrativu no munisípiu, maske ami hato’o beibeik, maibé nafatin la ajuda buat ruma, se udan boot ne’e akontese duni, maka ami ne’e hein para mate, tanba laiha irigasaun hodi taka mota ne’ebé mak tun husi foho mai. Maibé ami mós agradese ba nai ulun sira tanba fahe ona informasaun ba ami, molok situasaun sira ne’e akontese,” dehan Nia.(*)
